Shqipërinë e vizituan 3.6 milionë të huaj më pak

Kufizimi i lëvizjeve për shkak të pandemisë ka ndikuar ndjeshëm në hyrjen e shtetasve të huaj dhe daljen e shqiptarëve, duke ndikuar sidomos negativisht turizmin në vend.

Sipas INSTAT, numri i shtetasve të huaj të hyrë në Shqipëri në njëmbëdhjetëmujorin 2020 është 2.477.003, duke rënë me 59,5%, në krahasim me të njëjtën periudhë të vitit 2019. Në total janë 3.64 milionë shtetas të huaj më pak, në krahasim me 11 mujorin 2019.

Përgjatë njëmbëdhjetë muajve të 2020, Kosova ka rënien më të ulët të hyrjeve të shtetasve në Shqipëri me 40,4%, ndërsa rënien më të madhe e ka pasur Spanja me 90,7 %,krahasuar me të njëjtën periudhë të vitit 2019.

Hyrjet e shtetasve shqiptarë dhe të huaj në territorin shqiptar, në muajin Nëntor 2020, janë 360.343. Krahasuar me Nëntor 2019, ky tregues rezulton me rënie 48,1 %.

Në Nëntor 2020, hyrjet e shtetasve të huaj në territorin shqiptar janë 148.362, krahasuar me Nëntor 2019, ky numër ka rënë me 44,7 %.

Në nëntor edhe shtetasit nga Kosova kanë shënuar një rënie të lehtë, me 5.9%, ndryshe nga shtatori dhe tetori kur hyrjet e shtetasve nga Kosova njohën një rritje dy shifrore. Por rritje të fortë në nëntor  shënuan shtetasit nga Maqedonia, që ishin 29% më shumë se i njëjti muaj i një viti më parë.

Ndërsa kanë shënuar rënie të thellë hyrjet e shtetasve në nëntor nga Greqia (-89%), pas problemeve e vonesave në kufirin grek, nga Italia (-72%), nga Spanja (-93%), nga Polonia (-82%).

Për shkak të rënies së lartë të hyrjes së shtetasve të huaj gjatë këtij viti nga kufizimet e pandemisë, është rritur pesha e turistëve nga Kosova. Për 11 mujorin 2020, hyrjet e shtetasve nga Kosova përbënin 52% të totalit, nga 35% që ishte kjo peshë për të njëjtën periudhë të një viti më parë.

2.7 milionë shqiptarë më pak udhëtuan jashtë 

Edhe udhëtimet e shqiptarëve jashtë kanë qenë shumë të kufizuara, me 2.7 milionë shtetas nga Shqipëria që kanë dalë jashtë vendit për 11 mujorin, në krahasim me janar-nëntor 2019.

Sipas INSTAT, daljet e shtetasve shqiptarë dhe të huaj nga territori shqiptar, gjatë muajit Nëntor 2020, janë 366.335 duke shënuar një rënie me 53,5%, krahasuar me të njëjtën periudhë të një viti  më  parë.  Daljet  e shtetasve  shqiptarë  nga  territori  i  Shqipërisë  gjatë  muajit Nëntor 2020  janë 208.183.  Krahasuar  me Nëntor2019, ky numër ka rënë 56,6%.

Daljet e shtetasve të huaj nga territori i Shqipërisë gjatë muajit Nëntor2020, janë 158.152. Krahasuar me Nëntor2019, ky numër ka rënë 48,5%. Numri i shtetasve shqiptarë të dalë nga Shqipëria në njëmbëdhjetëmujorin 2020, është 2.691.130 duke rënë 50,5%, krahasuar me të njëjtën periudhë të një viti më parë./Monitor/