Shqipërisë në BE ia mbylli dyert Edi Rama dhe Balluku, Berisha: Ftoj shqiptarët me 17 prill, të flasin për të ardhmen e tyre në Europë!

Shqipërisë në Europë ia mbylli dyert Edi Rama dhe Belinda Balluku, tha sot Kryetari i Partisë Demokratike, Sali berisha, ndërsa ftoj shqiptarët me 17 prill të flasin për veten e tyre dhe për të ardhmen e tyre në Europë!

“Për Shqipërinë dhe shqiptarët, procesi më themelor për të ardhmen e tyre është integrimi i vendit në BE.
Shqipëria në Europë është ëndrra shekullore e shqiptarëve. Shqipëria në Europë është investimi i tyre 32-vjeçar.
Por Shqipëria në Europë është gjithashtu investimi i BE, Komisionit Europian, vendeve anëtare të BE, miliarda, miliarda, miliarde euro me të cilat ky vend është transformuar sa asnjë vend tjetër, po të kemi parasysh gjendjen në të cilën ishte.
Shqipërisë në Europë i mbylli dyert Edi Rama dhe Lubi Balluku. Do të ishte e padrejtë që të shkarkonim mbi Lubinë këtë përgjegjësi. Lubia ka përgjegjësi të mëdha për vjedhjet që ka bërë, për shpërdorimin, për vjedhjen e miliarda eurove.
Lubia ka disponuar 12 miliardë euro investime dhe tani, sipas vetë Edi Ramës, janë ndërtuar thotë ai, që nuk janë kurrë, po le ta supozojmë që është e vërtetë, 1 mijë kilometra rrugë, të cilat u shembën si rrugë kashte njëra pas tjetrës në këtë pranverë.
Por, njeriu që mbylli dyert e Europës, duke përdorur për këtë qëllim dosjen e Lubisë, pasi është dosja e tij, është Edi Rama dhe ka vetëm një emër, që quhet Edi Rama,” tha Sali Berisha.duke rikujtuar Raportin e tetorit të vitit 2025, kur Komisioni Europian ngriti si çështje themelore për Shqipërinë rritjen e presionit politik ndaj gjyqësorit nga Edi Rama, luftën e dobët kundër korrupsionit dhe problemet madhore me lirinë e medieve.

“Këto probleme jo vetëm që nuk morën një adresim të përshtatshëm dhe pozitiv, por njohën përkeqësimet më të mëdha në 32 vite.
Për herë të parë, parlamenti i Shqipërisë bllokon kërkesën e prokurorisë së vendit për arrestimin e zëvendëskryeministres Lubi Balluku.
Dhe këtë vendim, 83 mandatet e krimit që u përdorën si thika kundër drejtësisë nga Edi Rama, deputetët nuk e morën me vullnet të lirë, por në diktat të plotë të Edi Ramës.”
Madje, siç e dini, tha lideri i opozitës, Edi Rama deklaroi në mënyrë të papërgjegjshme se këtë vendim të tillë do ta merrte çdo parlament i çdo vendi demokratik.
“E vërteta është se një vendim të tillë nuk e merrte kurrë parlamenti i një vendi demokratik.
E vërteta është se për Brukselin, për shqiptarët dhe për cilindo njeri që ka ABC-në e shtetit ligjor, ky është një vendim antikushtetues me pasoja shumë të rënda, shkatërrimtare për luftën kundër korrupsionit.”

 Në fund, Kryetari i Partisë Demokratike u bëri thirrje qytetarëve që të reagojnë dhe të marrin në dorë të ardhmen europiane të vendit.

“BE foli. Nuk mbyllet asnjë kapitull pa votimin e IBAR, dhe IBAR nuk votohet pa arritur standardet e kërkuara. Bllokimi i IBAR do të thotë bllokim i mbylljes të çdo kapitulli. Dhe kjo po vjen kryekëput nga bllokimi që i bëri Edi Rama arrestimit të Lubi Ballukut për të mbrojtur veten e tij,” tha Kryetari i Partisë Demokratike, Sali Berisha, duke përfunduar:
Ftoj shqiptarët me 17 prill të flasin për veten e tyre, për të ardhmen e tyre në Europë!