“Shqiptarët, injorantët e Europës”/ Reagimi, PD: Turp dhe Skandal!
Pas publikimit të dhënave të Eurostat ku rezulton se Shqipëria me 42% të forcës aktive për punë në Shqipëri është me arsim 8-9 vjeçar dhe renditet si vendi i tretë në Europë me përqindjen më të lartë, reagon Partia Demokratike përmes Ish-Deputetit Luçiano Boçi duke e vlerësuar si skandalin dhe turpin e radhës:
“Kjo renditje ndjek atë për IQ ku Shqipëria renditej e parafundit. Dështim total i politikave arsimore. Kjo dëshmon braktisjen e madhe në arsim, ku shkaku kryesor mbetet pamundësia ekonomike e familjeve shqiptare dhe emigracioni galopant. 135 mijë ka shkuar numri i braktisjes nga fëmijët dhe të rinjtë i cikleve arsimore në këto vite,” thekson Luçiano Boç duke shtuar se renditja hedh poshtë alarmin e rremë për diplomime të pakufishme për të rinjtë, për shkak të numrit të madh të universiteteve.
“Ajo godet politikat e zbatuara nga Rama&company për të penguar të rinjtë shqiptarë të vazhdojnë arsimin e lartë dhe mungesën e stimulimit për të ndjekur arsimin e mesëm,” konstaton Ish-Deputeti i PD në reagimin e tij përmes rrjetit social Facebook duke shtuar se të dy klasifikimet rikthejnë shqetësimin për financimin e arsimit:
“Arsimi në Shqipëri mbetet sektori më pak i mbështetur dhe më pak i financuar. Vetëm 56 $ për frymë. Ndërsa në vendet e përparuara kjo shifër shkon nga 1000 deri në 3500 $ për frymë.”
Por në Shqipëri, thekson Ish-Deputeti i Partisë Demokratike, Luçiano Boçi, paratë e dedikuar fëmijëve dhe të rinjve grabiten, vidhen me PPP, konçesione e 100 marifete ndërsa përfundon:
“Me Ramën, fëmijët tanë, të rinjtë dhe arsimi i tyre nuk kanë të ardhme.
Hajduti psiqik i votave është hajduti i së ardhmes. Largimi i tij domosdoshmëri jetike për vendin.”
Ndryshe, sipas të dhënave të Eurostat, në tre shtete në Europë, punëdhënësit vuajnë më shumë për të gjetur fuqi punëtore me arsim të mesëm apo të lartë. Në vend të parë është Portugalia, ku 50% e forcës së aftë për punë, nga mosha 15 deri në 64 vjeç, është me arsim të ulët 8-9-vjeçar në vitin 2018. Në vend të dytë renditet Malta, me 47.4%. Dhe, shteti i tretë, me forcë pune “injorante” është Shqipëria.
