Shqiptarët protestojnë në Preshevë: Për identitet dhe dinjitet!
Me moton “Për identitet dhe dinjitet” shqiptarët në Preshevë filluan sot marshimin kundër shkeljeve të të drejtave të tyre nga Serbia ndërsa kërkuan ndalimin e pasivizimin e adresave, njohjen e teksteve shkollore në gjuhën shqipe, njohjen e diplomave të lëshuara nga Kosova, institucione të hapura për të gjithë, zbatimin e marrëveshjeve të nënshkruara dhe respektimin e detyrimit të shtetit ndaj shqiptarëve.
“Diskriminimi i Serbisë ndaj komunitetit shqiptar i ka prekur kufijtë e racizmit, prandaj nuk do të heshtim dhe protestat dhe reagimi ynë do të vazhdojë. Është lajm i mirë se pothuajse të gjitha subjektet politike shqiptare po e mbështesin protestën e ditët së sotme, konkretisht asnjë subjekt shqiptar në Luginë të Preshevës nuk është kundër kësaj proteste, normalisht protestat do të vazhdojnë edhe pas ditët së sotme,” tha Kryetari i Këshillit Nacional, Nevzad Lutfiu.
“Stop pasivizmit selektiv”, “Duam libra shqip”, “Kthema adresën”, ishin pankartat e protestuesëve shqiptarë që të veshur me fanella me mbishkrimin “Për identitet dhe dinjitet”, marshuan nëpër qendrën e qytetit të Preshevës.
Në protestën ku morën pjesë shqiptarët nga e gjithë Lugina e Preshevës, përveç Kryetarit të Këshillit Nacional, Nevzad Lutfiu, morën pjesë edhe deputeti i vetëm shqiptar në Parlamentin e Serbisë, Shaip Kamberi, dhe kryetarja e Komunës Preshevë, Ardita Sinani.
Ndryshe, kjo është protesta e dytë, pas asaj e cila u mbajt në Bujanoc më 12 gusht. Këtë protestë, Qeveria e Serbisë e cilësoi përpjekje të Qeverisë së Kosovës, të udhëhequr nga Albin Kurti për të destabilizuar rajonin.
