Shqiptarët rrisin preferencat për frutat tropikale, importet për avokadon u trefishuan

Është e pamundur të ndjekësh recetat e shëndetshme dhe të mos gjesh tek-tuk të integruar edhe avokadon. Avokadot klasifikohen edhe si fruta dhe si perime dhe për shqiptarët vijojnë ende të mbeten ende një konsum luksi që jo të gjithë e përballojnë duke pasur parasysh që kanë një çmim të të kripur, por ajo që vihet re është një rritje e importeve për këtë frut një tendencë që vihet re edhe për ananasin. Të dyja këto grupe kanë një rritje të sasisë së importit vit pas viti duke reflktuar një rritje të preferencës së shqiptarëve për ekzotiket.

Konkretisht të dhënat zyrtare të raportuara nga doganat tregojnë se për avokadon në vitin 2013 importet ishin modeste me një shifër pak më shumë se 33 mijë kilogramë, por në vitin 2014 ato kanë pësuar më shumë se dyfishim duke kapur një nivel 78 mijë kilogramë që në vlerë përkthehet në 60 mijë dollarë.

Në vitin pasardhës kemi një rënie të sasisë në 66 mijë kg, por nga 2015 e deri në 2017 tendenca ka qenë drejt një rritjeje të konsiderueshme. Në fund të vitit 2017 shifrat zyrtare tregojnë se importi i avokados arriti 109 mijë kilogramë me një vlerë ekuivalente në dollarë prej 182 mijë.

Sakaq rritje të sasive të importit ka pasur edhe grupi i ananasit. Të dhënat zyrtare të raportuara nga Doganat tregojnë se në vitin 2013 importet për këtë frut ishin 68 mijë kilogram me një vlerë prej 303 mijë dollarësh. Në vitin 2014 kemi një rënie të lehtë të importeve për të vijuar sërish rritjen në vitin 2015 me mbi 84 mijë kilogramë. Në fund të vitit 2017 të dhënat e raportuara tregojnë se importet e ananasit pothuajse u dyfishuan në raport me vitin 2013 me një sasi të regjistruar prej 123 mijë kilogramë. Vlera e importeve për këtë sasi ishte 132 mijë dollar.

Avokado dhe ananasi mbeten totalisht në dorë të importit pasi aktualisht nuk prodhohen në vendin tonë.  Avokado është një frut që rritet kryesisht në zonën tropikale dhe sub-tropikale në Amerikën Qëndrore.

Ndërkaq ananasi është një frut tropikal që rritet kryesisht në zona si Brazili, Filipinet, Tajlanda të cilat i eksportojnë drejt vendeve të tjera joprodhuese./Monitor/