“Shqiptarët terroristë”, Haradinaj shkarkon ministrin serb…

Kryeministri i Kosoves, Ramush Haradinaj ka shkarkuar Ministrin e Administratës Publike, Ivan Teodosijeviç, pasi ky i fundit i ka quajtur shqiptarët terroristë ndërsa Masakrën e Reçakut e ka cilësuar trillim.

“Sot kam marrë vendim për shkarkimin e Ministrit të Administratës së Pushtetit Lokal, Ivan Teodosijeviç. Është e patolerueshme një gjuhë e tillë e urrejtjes nga ministri në fjalë,” ka sqaruar Haradinaj përmes rrjetit social Facebook.

“Është e pakuptimtë se si një deri sot kolegë i yni shprehet me aq injorancë, urrejtje dhe fyerje për viktimat e Reçakut, viktimat e tjera të regjimit të Millosheviçit dhe akceptimin dhe miratimin që ai i bëri terrorit të këtij regjimi. Kjo nuk arsyetohet”.

Në fund, Qeverinë që unë e drejtoj, tha Kryeministri i Kosovës, Ramush Haradinaj, nuk do të ketë vend për askë që në çfarëdo mënyre fyen të tjerët në bazë etnike, racore, fetare apo tjetër, e as ata që synojnë të akceptojnë politikat e tilla. Vendimi hyn në fuqi menjëherë”.

Ndryshe, ministri i MAPL-së në Qeverinë e Kosovës, Ivan Teodosijeviç, gjatë një fjalimi në Zveçan me rastin e 20 vjetorit të bombardimeve të NATO-s, tha se terroristët shqiptarë trilluan gjithë këtë histori dhe bënë krimet më të mëdha në Kosovë.

“Arsyeja për agresion në shtetin tonë ka qenë e ashtëquajtura katastrofë humanitare në Kosovë e Metohi. Masakra e Reçakut ishte trillim, kurse janë terroristët shqiptarë atë që trilluan gjithë këtë histori dhe bënë krimet më të mëdha në Kosovë e Metohi. Për këtë, sot askush nuk ka dhënë përgjegjësi. Kanë bërë krime para agresionit të NATO-s, kanë vrarë shtëpiak të mirë serbë dhe policë në vendin e tyre të punës. Gjakpirjen e tyre e kanë vazhduar edhe gjatë agresionit dhe pas ardhjes së misionit të ashtëquajtur paqësor në Kosovë e Metohi.”