Shtatori i vështirë, Oda Ekonomike: Të miratohet Ligji dhe të shfrytëzohet Trusti!

Muaji shtator do të jetë më i vështirë sa i përket ekonomisë, dhe mjetet e Trustit duhet të shfrytëzohen. Kështu bëri të ditur sot Kryetari i Odës Ekonomike të Kosovës, OEK, Berat Rukiqi, duke shtuar se muaji shtator është më i vështirë se të tjerët, jo vetëm për shkak të pandemisë.

Kryetari i Odës Ekonomike të Kosovës ka kërkuar sot miratimin sa më shpejtë të Ligjit për Rimëkëmbjen Ekonomike në mënyrë që të rritet efikasiteti për menaxhimin e ekonomisë në këtë kohë pandemie.

“Ligji për rimëkëmbjen ekonomike e ka të njëjtën rëndësi me ligjin për pandeminë. Problemi kryesor i pakos emergjente qëndron te mungesa e efikasitetit, pra vendosja e parasë në kohën e duhur. Ne mendojmë që mjetet e Trustit duhet të jenë në dispozicion të qytetarëve. Në secilën shumë qytetarët janë të gatshëm ta tërheqin dhe shfrytëzojnë, pra është diçka e domosdoshme,” tha Rukiqi duke shtuar:

“Mjetet e Trustit është mirë që t’i shfrytëzojnë ata qytetarë që kanë mundësi. Të gjithë qytetarët janë të gatshëm ta heqin dhe ta shpenzojnë, 50, 100, 1000 sa të jetë nevoja.”

Sipas kreut të OEK paratë e Pakos Emergjente duhet të futen në treg të paktën deri në nëntor.

“Ne mendojmë që ligji mundëson që masat të implementohen më shpejt. Nëse ne dëshirojmë me kriju rimëkëmbje ekonomike, duhet që në tetor ose më së largu në nëntor paratë e Pakos Emergjente të futen në treg. Kemi hapësirë për ndryshime. Është ligji për TVSH-në që ne mendojmë se do ta rrit konsumin ditor e ulë informalitetin,” tha Rukiqi duke folur edhe për nevojën e digjitalizit.

“Masë tjetër e rëndësishme sipas nesh është digjitalizimi. Kisha kërkuar që qeveria të shtojë disa masa që lidhen me energjinë dhe efiçiencën e saj.”

Ndryshe, të premten ka dështuar për herë të dytë votimi i Projektligjit për Rimëkëmbje Ekonomike. Nga 90 deputetë të pranishëm në sallë, kanë votuar vetëm 45 deputetë. Sërish këtë Projektligj nuk e kanë votuar Lëvizja Vetëvendosje dhe Partia Demokratike e Kosovës.