Shtëpia e Bardhë: Takimi Hoti-Vuçiç do të mbahet më 4 shtator

Kryeministri i Kosovës, Avdullah Hoti dhe presidenti i Serbisë, Aleksandar Vuçiç do të takohen më 4 shtator në Washington. Takimi, që fillimisht u caktua për 2 shtator, është shtyrë për 4 shtator, tha për RFE zëdhënësi i Këshillit për Siguri Kombëtare, John Ullyot.

“Këshilltari për Siguri Kombëtare, Robert O’Brein ka ftuar liderët e Kosovës dhe Serbisë në Washington më 4 shtator. Bisedimet janë shtyrë për dy ditë, nga 2 shtatori kur ishin paraparë që të mbaheshin, për arsye të planifikimit,” thekson Ullyot duke shtuar se Washingtoni mirëpret bisedimet e 4 shtatorit, të cilat, sipas tij, do të kenë në fokus çështjet ekonomike.

“Shtetet e Bashkuara mirëpresin këto bisedime të rëndësishme ndërmjet kryeministrit të Kosovës, Avdullah Hoti dhe presidentit të Serbisë, Aleksandar Vuçiç. Ne besojmë në përparim në çështjet ekonomike, përfshirë krijimin e vendeve të punës dhe përshpejtimin e rritjes ekonomike, si hap i parë drejt përparimin në procesin e paqes,” tha zëdhënësi i Këshillit për Siguri Kombëtare, John Ullyot.

Ndryshe, më herët nga administrata amerikane është konfirmuar për RFE se nikoqirë të takimit do të jenë Këshilltari për Siguri Kombëtare i Shtëpisë së Bardhë, Robert O’Brien dhe I dërguari i Presidentit të Shteteve të Bashkuara për dialogun Kosovë-Serbi, Richard Grenell.