“Shteti funksional”, Osmani: Qeveria do ti ketë 12 ministri

Kandidatja për kryeministre e LDK-së , Vjosa Osmani, e ftuar në debatin “Fol hapur”, me temën “Shteti funksional sipas Vjosa Osmanit” ka sqaruar se në mbledhjen e parë të Qeverisë do të rekomandoj që të shkarkohen të gjitha bordet që kanë performancë negative.

“Shteti është funksional nëse dita e një qytetari dhe viti është në radhë të parë i përballueshëm në aspektin e mbrojtjes që i bëhet të drejtave të tyre dhe aspektin financiar, në aspekt të lëvizjes së lirë e komunikimin që e ka me jashtë dhe mënyra se si të drejtat ua garantojmë në letër secili qytetar mund t’i mbrojë në sistemin e drejtësisë”, tha Osmani, raporton EO.

Sipas saj me zvogëlim të ministrive nuk do të largohen të punësuarit nga puna, por do të bashkohen.

“Riorganizimi i Qeverisë nuk nënkupton vetëm reduktimin e ministrive, kemi planifikuar qeveria të përbëhet nga 12 ministri, nuk nënkupton që punëtorët e sektorit publik të largohen, por do të ketë bashkim të ministrive që të kemi funksionalitet dhe të kontribuohet drejtpërdrejt në qeverinë e ardhshme”.

Me këtë rast ajo sqaroi planin kombëtar të kursimeve:

“Planifikojmë të kemi plan nacional të kursimeve financiare sepse skemat janë duke shkaktuar humbje milionëshe, ne brenda plani nacional për kursime të qeverisë duhet të rishikojmë skemat që janë shndërruar në skema korruptive”.

Qeveria që ajo do të udhëheqë, sqaroi kandidatja e LDK, nuk do të kenë të rinjtë librezë partiake si parakusht për të hyrë në punë, gjë që sipas saj është duke ndodhur.

“Meritokracia duhet të jetë vlera kryesore që ne do ta kultivojmë gjatë qeverisjes se ardhshme. Ne nuk synojmë të qeverisim në këtë shtet duke vendosur kontroll mbi institucionet e sigurisë dhe drejtësisë është e pakontestueshme se si sot ka liderë që vendosin se kë ta bëjnë kryeprokuror është logjika e Prontos, nuk ka të drejtë kryeministri të vendos se kë të bëj kryeprokuror dhe as nuk duhet të përzihet”.

Por si do ta arrijë ç’kapjen Vjosa Osmani:

“Ne nesër nuk do bashkëqeverisim me parti te tilla, ç’kapja arrihet nëse bashkëqeverisim me parti që e kanë seriozisht këtë që po e them, Qeveria e LDK-së nuk vendos se kush të jetë kryeprokuror, prokurorët e vendosin këtë.

Kemi nevojë të kemi bashkëpunime fikas me shtete model që të bëjmë dekriminalizim të institucioneve është kancer në shoqërinë tonë lidhja e krimit në nivelit të lartë me institucionet qeverisëse dhe kjo që të ndryshoj shembullin duhet të jetë nga kryeministrja e vendit,” raporton RTK.

Në fund, vendimet e para, tha Vjosa Osmani, në rast se vjen në krye të Qeverisë do të jenë:

“Në mbledhjen e parë të qeverisë do propozoj të shkaktohen gjitha bordet që kanë performancë negative nga auditori i përgjithshëm, do të propozoj masa konkrete të rishqyrtimit të projekteve të caktuara që investimi të shkoj në shëndetësi dhe programi i veçantë për rini. Sfidë do jetë që t’i bindi partnerët partiak që mos t’i shikojnë institucionet e drejtësisë si sistem ku mundesh të ndërhysh. Nëse ndonjë ministër apo vartës i tij i bën presion ndonjë gjyqtari e prokurori nuk do ta kenë më vendin në atë qeveri”, tha Osmani