Shtyhet seanca gjyqësore për Berishën, avokati: SPAK s’ka çështje hetimore, kërkojmë zëvendësimin e masës

Gjykata e Posaçme shtyu sot për më 11 korrik seancën gjyqësore për Ish-Kryeministrin Sali Berisha.

Sipas Gjykatës, seanca për informacion 2 mujor për Berishën do të mbahet më 11 korrik në orën 10:00 dhe shkak i shtyrjes ishte mosmarrja e njoftimit për seancën nga Sali Berisha.

Pas këtij vendimi ka reaguar avokati i ish-kryeministrit, Genc Gjokutaj, duke theksuar se zëvendësimi i masës së sigurisë ndaj kreut të Partisë Demokratike, Sali Berisha kërkohet sepse SPAK nuk ka një çështje hetimore.

“Afatet ata i kanë 6 mujore dhe mund të marrin zgjatur. Në datën 11 korrik në orën 10:00 është caktuar seanca tjetër, ne ndërkohë do të marrim materialet e hetimeve 2 mujore se çfarë ata kanë hetuar dhe do të shikojmë dhe qëndrimin e tyre.

Këta nuk vendosin në dijeni më papara, por veprojnë në mënyrë autonome dhe vendosin e komunikojnë kur të duan, sipas direktivës që ka ecur deri tani,” tha avokati i Berishës duke folur dhe për ndryshimin e masës.

“Absolutisht ne ndryshimin e masës e kemi permanent me të gjitha objektet e mundshme. Kjo seancë është posaqërisht për masën, sepse raportimi dy muajsh bëhet në funksion të masës së sigurisë, dhe si rezultat i hetimeve bëhet një rezyme, nëse kjo masë duhet të vijojë apo të zëvendësohet me masë tjetër.

Ne zëvendësimin e masës nuk e kërkojmë për arsye shëndetësore, apo shkaqe humane. Ne e kërkojmë sepse mungon çështja në thelb. Këta dhe ta zgjasin dhe mos e zgjasin afatin, një çështje që nuk ka çështje brenda, sigurisht që nuk mund të zgjatet, por të pushohen hetimet,” tha Avokati Genc Gjokutaj duke përfunduar:

“Hetimet janë shtrirë në drejtim të tjera, në rrethana që nuk kanë lidhje me korrupsionin.”