“Shtyrja e afatit për aplikim të mërgatës”, në KQZ mungojnë LDK, PDK e AAK, LVV: E pandershme!
Komisioni Qendror i Zgjedhjeve në Kosovë nuk arriti të mbajë mbledhjen e ftuar për orën 13:30 në mungesë të kuorumit, ku ishin dy përfaqësuesit e LVV-së, por jo edhe ata të PDK-së, LDK-së e AAK-së, ndëkohë u mësua se sot do të diskutohej shtyrja e afatit për aplikim të mërgatës si votues i cili përfundon sot në 24:00.
Pas konstatimit të prezencës së vetëm 4 nga 11 anëtarët e Komisionit Qendror të Zgjedhjeve, kreu i KQZ-së, Kreshnik Radoniqi tha se kjo mbledhje do të mbahet në një rast tjetër ndërsa anëtari i KQZ-së nga Lëvizja Vetëvendosje, Alban Krasniqi, mungesën e kolegëve të partive të tjera në tryezën vendimmarrëse e quajti të pandershme.
“Duke parë trendin i cili është në rritje të aplikimeve dhe me qëllim të mundësimit të qytetarëve që jetojnë jashtë vendit që t’i mundësohet aplikimi, është shqyrtuar mundësia e shtyrjes së afatit. Raporti në tërësi e jep rekomandimin që ky afat të mund të shtyhet dhe pse prekë disa aspekte organizative. Mungesa e kolegëve këtu lidhet pikërisht me këtë çështje. Ata edhe më herët kanë shfaqur kundërshtime për çfarëdo shtyrje të afateve apo edhe veprime që KQZ duhet të ndërmerr në raport me përfshirjen sa më të madhe të mërgatës,” tha Alban Krasniqi duke konkluduar se mungesa e tyre është përpjekje për të pamundësuar shtyrjen e afatit deri të dielën e 29 dhjetorit.
“A i ka kapur barku, a i ka kapur zemra. Pse bash sot nuk janë, çka ka që mungojnë sot meqë nuk e kanë lajmëruar mungesën e tyre, është e pazakontë. Kjo mungesë kështu është e pandershme edhe në aspektin kolegial sepse ka qenë kërkesë e tyre që diskutimi të ndodhte me datën 26 dhjetor. Unë kërkoj që të shfrytëzojmë mundësitë tjera, sepse ne nuk mundemi që për një çështje kaq të rëndësishme ta mbyllim e mos ta trajtojmë.”
Me këtë rast, anëtari i KQZ-së nga Lëvizja Vetëvendosje, Alban Krasniqi, ka treguar se deri më tani janë aprovuar si votues jashtë vendit 83. 446 votues nga mërgata, ndërkaq tha se 8. 979 kërkesa janë në pritje ndërsa përfundoi:
“Që i bie si shifër e përafërt janë diku 92 mijë qytetarë deri më tani të cilët konsiderohen si votues jashtë vendit dhe ky trend është në rritje edhe sot kur po flasim!”
