Shuhet Agim Musta!

Është ndarë nga jeta në moshën 89-vjeçare, i mbijetuari i torturave të burgut famëkeq komunist të Spaçit, Agim Musta.

Agim Musta përveç qëndresës ndaj torturave komuniste, do të mbahet mend për dokumentimin, zbardhjen dhe rrëfimin e periudhës më famëkeqe të kombit shqiptar.

Aty ku ishte krimi komunist kishte dëshmi, aty ku ishte dëshmia kishte dokumentin, aty ku ishte dokumenti kishte rrëfimin e burimit të këtij dokumenti; Ky ishte i palodhuri Agim Musta!

Lajmin për ikjen nga kjo jetë, të mikut dhe bashkëvuajtësit Agim Musta, Shoqata e Të përndjekurve Antikomunist e mori me pikëllim të thellë.

I burgosuri politik antikomunist i dikaturës komuniste, intelektuali, shkrimtari, historiani, mësuesi, aktivisti i të drejtave të njeriut veçanërisht të të përndjekurve politikë antikomunistë, autor i dhjetëra librave, dokumentarëve, artikujve e intervistave për zbardhjen e dokumentimin e krimeve të komunizmit, iku duke na lënë një trashëgimi të veçantë historike e artistike, thekson Shoqata e Të përndjekurve antikomunistë.

Agim Muista lindi në vitin 1930, në qytetin e Gjirokastrës. Kreu studimet në Fakultetin Histori-Filologji të Universitetit të Tiranës. Në vitin 1962 u dënua me 13 vjet heqje lirie si kundërshtar politik i regjimit komunist.
Ka punuar arsimtar në shkolla të ndryshme tetëvjeçare dhe të mesme të vendit. Agim Musta ka shkruar për komunizmin, sistemin e burgjeve dhe persekutimin në kohën e diktaturës

Botimet
“Mandelat e Shqipërisë”, 1992
“Dosjet e gjalla”
“Kush ishte Enver Hoxha” (bashkëautor), 1996
“Burgjet e shtetit burg”, 1998
“Mjerim pafund”, 1999
“Harta e burgjeve dhe kampeve me punë të detyruar (1944-1991)”
“Gjëmat e komunizmit në Shqipëri”, 2001
“Dëshmoj për të vërtetën”, 2004
“Antologjia e plagëve nën terrorin komunist” (bashkëautor), 2 vëllime 2006
“Album i burgjeve të diktaturës komuniste”, 2006
“Libri i zi i komunizmit”, 2007

Të përndjekurit politikë antikomunistë të Shqipërisë duke ju shpreh ngushëllimet e sinqerta dy bijave të Agimit dhe gjithë të afërmëve e miqëve të tij, shprehen se janë pranë tyre në këtë humbje e dhimbje të madhe.

Nderim përjetë punës dhe sakrificës së tij !

Krenar që ishe njëri nga ne !

Qofsh i Prajsës, miku ynë i shtrenjtë !