Shuhet Bedri Sadiku

Shuhet gazetari i njohur shqiptar Bedri Sadiku. Lajmin mbi vdekjen e dha familja e tij.

Bedri Sadiku u lind në Preshevë, ndërsa studimet i përfundoi në Fakultetin Filologjik në Shkup dhe studimet master në Zagreb të Kroacisë. Për shumë vjet rresht punoi në gazetën Rilindja, fillimisht në Prishtinë, gjatë viteve 80-të, ndërsa më vonë gjatë viteve 90-të në Tiranë dhe Shkup.

Gjatë viteve të luftës në Kosovë përcolli për së afërmi krizën e refugjatëve në Maqedoni, teksa me intervistat e tij me ish ambasadorin amerikan Christopher Hill luajti një rol të rëndësishëm në sensibilizimin e çështjes së Kosovës.

Gjatë kohës së luftës Sadiku ka kontribuar shumë me Agjencinë e Lajmeve KosovaPress, duke raportuar për ngjarje për refugjatët dhe një pjesë për zonën e Nerodimes për të vazhduar bashkëpunim edhe pas çlirimit.

Bedri Sadiku u angazhua nga ditët e para të themelimit të televizionit mbarëkombëtar TV Alsat në Tiranë si korrespodent në Maqedoni, kur dhe hapi Zyrën në Shkup, e cila më pas u rrit deri në televizion kombëtar që është dhe sot si TV Alsat-M.

Varrimi i të ndjerit do të bëhet në varrezat e qytetit në Prishtinë Dragodan/Arbëri me Ikindi në ora 15:00. Për shkak të pandemisë, varrimi i të ndjerit, Bedri Sadiku, do të bëhet konform rregullave të IKSHP-së.