Shuhet Donald Rumsfeld

Shuhet Donald Rumsfeld! Rumsfeld cili shërbeu dy herë si Sekretar i Mbrojtjes si dhe konkurroi si kandidat për president i Shteteve të Bashkuara, u nda nga jeta në moshën 88-vjeçare.

“Me dhimbje të thellë ndajmë lajmin për vdekjen e Donald Rumsfeldit, një burrë shteti, një bashkëshort, baba, gjysh e stërgjysh i përkushtuar,” tha familja e tij përmes një deklarate. Ai u nda nga jeta i rrethuar nga të afërmit në qytetin Taos të shtetit New Mexico. Deklarata nuk specifikonte ditën e vdekjes.

Donald Rumsfeld, i cili krahasohet me Ish-Sekretarin e Mbrojtjes së periudhës së Luftës së Vietnamit, Robert McNamara, për nga ndikimi dhe autoriteti që gëzonte në Washington si shef i Pentagonit, është zyrtari i vetëm i cili dy herë ka qenë Sekretar i Mbrojtjes, nga viti 1975 deri në vitin 1977 dhe nga viti 2001 deri në vitin 2006, duke i shërbyer 4 Presidentëve. Kolegët e kanë konsideruar si njeri luftarak dhe patriot të mençur.

Me Rumsfeld në postin e shefit të Pentagonit, forcat amerikane rrëzuan me shpejtësi presidentin irakian Sadam Husein, por nuk arritën të vendosin stabilitetin në këtë vend dhe Iraku shumë shpejt precipitoi në kaos e dhunë mes myslimanëve suni dhe shiitë. Prania ushtarake amerikane në Irak vazhdoi deri më 2011, vite pasi Rumsfeld ishte larguar nga Pentagoni.

Ai gjithashtu ishte i ngarkuar për invasionin amerikan në Afganistan në vitin 2001, qëllimi i të cilit ishte që të largohen nga pushteti liderët talebanë që i ofruan strehim liderëve të Al Kaedas, përgjegjës për sulmet terroriste të 11 Shtatorit në SHBA.

Pasi u largua nga posti, Donald Rumsfeld arriti sukses të konsiderueshëm financiar duke shërbyer si shef ekzekutiv i dy prej kompanive më të mëdha amerikane. Në vitin 1988 ai konkurroi për pak kohë për emërimin e republikanëve si kandidat në zgjedhjet presidenciale.

Donald Rumsfeld ishte pilot i marinës ushtarake amerikane, Ambasador amerikan në NATO dhe ligjvënës në Kongresin amerikan. Ai lë pas bashkëshorten dhe tre fëmijë./VOA/