Shuhet Haxhi Thaçi

Shuhet Haxhi Thaçi! Lajmin për ndarjen nga jeta të babait të Ish-Presidentit të Kosovës e ka konfirmuar mbrëmjen e së dielës, i biri i Hashim Thaçit, Endriti.

“Baci i mbylli sytë i qetë pas takimit të fundit me babin! Ke qenë gjithmonë frymëzim për mua dhe familjen! Vuajtjet nga padrejtësia u bënë të papërballueshme! Prehu në paqe, bac!”, shprehet Endrit Thaçi shoqëruar me një foto me gjyshin e tij i cili ndërroi jetë tre ditë pasi takoi të birin, Ish-Presidentin Hashim Thaçi.

Ndryshe, Haxhi Thaçi kishte kohë që po përballej me probleme shëndetësore dhe po merrte trajtim në  Klinikën Interne në QKUK në Prishtinë.

Ish-Presidenti i Kosovës, Hashim Thaçi, i cili aktualisht po përballet me gjykimin në Gjykatën Speciale Hagë që nga Nëntori i vitit 2020, më 13 mars 2025 mori leje për të vizituar babanë e tij në spital, pas disa refuzimeve nga gjykata. Pas vizitës treorëshe, ai u rikthye sërish në paraburgim në Hagë.