Shuhet Dr.Bujar Bukoshi, Presidentja e Kosovës: Burrë shteti me përkushtim të pashoq!

Një mjek me vizion dhe një burrë shteti me përkushtim të pashoq, e ka cilësuar Presidentja e Kosovës, Vjosa Osmani, Ish-Kryeministrin në ekzil, Dr.Bujar Bukoshi i cili mëngjesin e sotëm ndërroi jetë.

“E nderuara familje Bukoshi,

Me dhimbje të thellë mora lajmin për ndarjen nga jeta të Dr. Bujar Bukoshit, një mjek me vizion dhe një burrë shteti me përkushtim të pashoq.

Dr. Bukoshi, ish-kryeministër në ekzil, do të kujtohet përherë për kontributin e tij për fuqizimin e kauzës së Kosovës së lirë e të pavarur në kohët më të rënda për popullin tonë,” shprehet Vjosa Osmanin në ngushëllimin e saj duke shtuar se kontributi i tij si mjek, intelektual dhe udhëheqës politik ka lënë gjurmë të pashlyeshme në ndërtimin e rrugës sonë drejt lirisë dhe pavarësisë ndërsa përfundon:

“Për dekada me radhë, ai i shërbeu vendit me dinjitet, dije dhe vendosmëri. Në këto çaste të rënda për familjen, bashkëndjej me ju dhe ju inkurajoj që të gjeni forcë në përballimin e dhimbjes.

I përhershëm qoftë kujtimi për Dr.Bujar Bukoshin!”