Shuhet shkrimtari madh Ismail Kadare
Shuhet shkrimtari i madh shqiptar, Ismail Kadare! Kadare ndërroi jetë mëngjesin e sotëm, në moshën 88-vjeçare.
Veprat e tij janë përkthyer në 45 gjuhë të botës, duke qenë kështu dhe përfaqësues kryesor i letërsisë shqipe nëpër botë. Disa herë kandidat për çmimin “Nobel” në Letërsi, Ismail Kadare është nderuar me shumë çmime ndërkombëtare.
Presidenti i Republikës së Shqipërisë e ka dekoruar Ismail Kadarenë me Urdhrin “Nderi i Kombit”.
Ismail Kadare ka lindur në Gjirokastër më 28 janar 1936. Akademik, politikan, ish-deputet i Kuvendit Popullor (1970-’82) dhe Zv/Kryetar i Frontit Demokratik.
Rrugën e krijimtarisë letrare e nisi si poet që në vitet e gjimnazit me “Frymëzimet djaloshare” (1954); “Ëndërrimet”, (1957), por u bë i njohur sidomos me vëllimin Shekulli im (1961), që u pasua nga vëllimet e tjera poetike, si: Përse mendohen këto male (1964), Motive me diell (1968) dhe Koha (1976).
Në fushën e prozës, vepra e parë e rëndësishme e Ismail Kadaresë në prozë është romani “Qyteti pa reklama”, që nuk u lejua të botohej i plotë deri në vitin 2003.
Prozën e tij e karakterizojnë përgjithësimet e gjëra historiko-filozofike, subjekti i ngjeshur dhe mendimi i thellë i shprehur shpesh me anë të parabolës, mbi bazën e asociacionit apo të analogjive historike. Romani më i njohur shqiptar është “Gjenerali i ushtrisë së vdekur” (1964) ndërsa temën e shpirtit të pamposhtur të shqiptarëve nëpër shekuj autori e trajtoi edhe në romanin “Kështjella” (1975).
Në romanin “Kronikë në gur (1970) Kadare kritikoi psikologjinë provinciale ndërsa probleme të rëndësishme të historisë janë trajtuar edhe në përmbledhjet me tregime e novela “Emblema e dikurshme” (1977), “Ura me tri harqe” (1978) dhe “Gjakftohtësia” (1980).
Një nga krijimet më të rëndësishme të Ismail Kadaresë dhe letërsisë së re shqipe është romani “Nëpunësi i pallatit të ëndrrave” (1981).
Në vitin 1990 Ismail Kadare vendosi të largohet nga Shqipëria dhe të qëndrojë në Paris, largimi i cili u dënua nga autoritetet e kohës, por krijimtaria e tij nuk u ndalua.
Vitet e fundit, jetën e ndau mes Francës dhe Shqipërisë.
