“Shullazi” në Apel/ Koni dhe Kule janë kërcënuar, Prokuroria: Kemi prova…

Prokuroria e Krimeve të Rënda ka apeluar vendimin e Shkallës së Parë për dënimin e grupit të Emiljano Shullazit, pasi pretendon fajësi edhe për kërcënimet e Mynyr Konit dhe Dhori Kules.

Sipas Gjykatës, në vendimin e dhënë më 13 nëntor, Emiljano Shullazi dhe të akuzuarit e tjerë nuk u shpallën fajtorë për kërcënimin e dy profesorëve dhe as për tritolin e vendosur në një punishte në Lushnje.

Vendimi i trupës gjykuese të kryesuar nga gjyqtari Fran Prendi bazohet pas dëshmive të dy profesorëve në Gjykatë që nuk e pranuan se kërcënimet erdhën nga të akuzuarit.

Gjithashtu, për Gjykatën nuk faktohej se ishin këta persona ata që kishin vendosur tritol në biznesin e Adriatik Kërçukut në Lushnje.

Ndërkohë janë edhe 5 avokatët mbrojtës të Shullazit dhe pjesëtarëve të grupit të tij, që kanë depozituar në Apel ankimimin ndaj klientëve të tyre, duke kërkuar pafajësi për ta. Sipas tyre, Gjykata dënoi Shullazin dhe anëtarët e tjerë të grupit si pasojë e një presioni të madh të jashtëm që kanë pasur nga politika dhe ndërkombëtarët.

Pas ankimimit të Prokurorisë dhe avokatëve, pritet hedhja e shortit të gjyqtarëve të Apelit për këtë dosje.

Ndryshe, më 13 nëntor ky grup u dënua me 55 vite burg. Emiljano Shullazin, i konsideruar si kreu i këtij grupi kriminal, u dënua me 14 vite burg ndërkohë që Prokuroria kishte kërkuar 17. Shullazi u dënua për akuzën e gjobëvënies dhe atë të krijimit të grupit të strukturuar kriminal