Shumë trafik?! Në rrugët e vendit, këtë vit u shtuan71 mijë automjete

Për periudhën janar-shtator 2024 në rrugët e vendit janë regjistruar 71.4 mijë mjete të reja, sipas të dhënave që janë bërë publike nga INSTAT. Nga këto, rreth 60 mijë ishin autovetura.

Deri në shtator numri gjithsej i mjeteve rrugore me status “aktiv” dhe “të çregjistruar përkohësisht” që qarkullojnë në territorin e Republikës së Shqipërisë deri në Shtator 2024, rezulton 939.152 mjete.

Në kategorinë e mjeteve rrugore sipas llojit, përqindjen më të madhe ndaj numrit gjithsej të mjeteve rrugore e zënë “Autoveturat” 80.8 për qind, “Automjetet për transport të përzier” 6.0 për qind, dhe, “Motor” 5.7 për qind.

Sipas INSTAT, gjatësia e rrjetit rrugor në shfrytëzim është 3.606* km, klasifikuar sipas kategorive, si autostradë, rrugë interurbane kryesore, rrugë interurbane dytësore, rrugë urbane dhe rrugë lokale. Rrugët interurbane dytësore zënë rreth 74.2 për qind të gjatësisë së rrjetit rrugor.

Tirana ka më shumë automjete

Në tremujorin e tretë 2024, numri më i lartë i mjeteve rrugore është në qarkun e Tiranës, duke zënë 34.9 për qind të mjeteve rrugore gjithsej në vend, pasuar nga qarku i Durrësit me 1.5 për qind të mjeteve rrugore gjithsej.

Qarqet me numrin më të vogël të mjeteve rrugore janë qarku i Gjirokastrës me 2.2 për qind dhe qarku i Kukësit me 2.3 për qind të mjeteve rrugore gjithsej.Mercedez Benz, akoma mbizotëron

Marka “Mercedez Benz” është marka me qarkullim më të lartë në vend në kategorinë e mjeteve rrugore me 18.0 për qind, e ndjekur nga marka “Volkswagen” me 16.3 për qind dhe “Daimler Chrysler” 8.2 për qind.

Gjatë tremujorit të tretë 2024, janë regjistruar për herë të parë 26.183 mjete rrugore. Në kategorinë e mjeteve rrugore sipas llojit të regjistruar për herë të parë, përqindjen më të madhe e zënë “Autoveturat” me 84.8 për qind dhe “Motor” me 7.9 për qind.

Numri më i lartë i mjeteve rrugore të regjistruara për herë të parë, është në qarkun e Tiranës, duke zënë 38.9 për qind ndaj mjeteve rrugore gjithsej të regjistruara në vend në tremujorin e tretë 2024.

Qarqet me numrin më të vogël të mjeteve rrugore të regjistruara për herë të parë, janë qarku Gjirokastër me 1.4 për qind dhe qarku Dibër me 2.1 për qind.

Volkswagen po shton dominimin

Marka “Volkswagen” është marka me qarkullim më të lartë në vend në kategorinë e mjeteve rrugore të regjistruara për herë të parë me 21.4 për qind, e ndjekur nga marka ““Mercedez Benz” me 17.6 për qind./Monitor/