Si Berisha me dosjet para, Bardhi: Në Kuvendin e 18 Dhjetorit, 5.259 delegatë

Partia Demokratike përmes Sekretarit të Përgjithshëm, Gazment Bardhi, kishte vendosur si lideri historik Sali Berisha me dosjet para, të bëjë transparencën e Kuvendit Kombëtar të 18 Dhjetorit duke konfirmuar se 5.259 delegatë kanë konfirmuar pjesëmarrjen:

“Thirrjes përçarëse të zotit Berisha për të grisur formularët e konfirmimit, nuk i janë përgjigjur, 5.259 anëtarë të Kuvendit Kombëtar të PD ose 69% e anëtarëve: Dibër- 352, Korçë- 326, Berat – 287, Lezhë – 258, Shkodër – 389, Gjirokatsër- 205, Vlorë – 342, Fier – 508, Durrës – 308, Elbasan – 544, Tiranë – 1326, Kukës – 112, Anëtarësia e Këshillit Kombëtar që ka firmosur – 302.

Në total, me shumicë absolute, 5259 anëtarë të Kuvendit Kombëtar, kanë konfirmuar deri tani.” tha Sekretari i Përgjithshëm i partisë së asfiksuar që tashmë nuk ka as dhe një ide se si ta bëjë transparencën e një Kuvendi Kombëtar që e ka thirrë vetë ndërsa e quan veten institucion, por kopjon liderin historik Sali Berisha i cili me dosjet para konfirmoi në Hotelin Rogner, se nisma e “Foltores” kishte arritur të mbledhë 4.200 firma dhe ato do ti dorëzoj pranë Zyrës së Kryetarit të Këshillit Kombëtar.

Për të mos tradhëtuar traditën e sjelljes arrogante, Sekretari i Përgjithshëm, Gazment Bardhi, nuk tha se pse 11 kryetarë të Degëve kishin dalë kundër vendimeve të Kryesisë por paralajmëroi masa ndëshkimore.

“11 kryetarë të Degës nuk kanë pranuar që të jenë pjesë e procesit të 18 dhjetorit. Të gjithë ata që nuk kanë kryer përgjegjësitë, si Sekretar kam nisur përgatitjen e një raporti dhe shumë shpejt do të mblidhet Kryesia për të parë veprimet e mëtejshme.”

Në fund për ti qëndruar besnik regjisë “Sali Berisha” e ftoj liderin historik në Kuvendin e 18 Dhjetorit:

“Me 18 ftoj edhe zotin Berisha të vijë në Kuvend dhe të parashtrojë çështjet që ai do.”