Si do menaxhohen 1.15 mld euro?! Presidentja e KE: Do dërgojmë ekspertë në Shqipëri!

Pas përfundimit të Konferencës së Donatorëve, e cila mblodhi një shumë prej 1.15 miliardë euro për rindërtimin e Shqipërisë së goditur nga tërmeti, Kryeministri Edi Rama dhe Presidentja e Komisionit Evropian, Ursula von der Leyen, në një konferencë për shtyp sqaruan se si do të menaxhohen këto fonde dhe cila do të jetë transparenca për përdorimin e tyre si dhe procesin e rindërtimit.

Presidentja e KE tha se do të nënshkruajë një marrëveshje me kryeministrin Rama për të bërë gjithçka në mënyrë transparente, ndërsa shtoi se do të dërgojnë në Shqipëri një grup ekspertësh, për të ndjekur nga afër të gjithë procesin.

Me këtë rast, Ursula von der Leyen u pyet dhe për integrimin e Shqipërisë, duke thënë se vendi ynë i ka plotësuar të gjitha kushtet dhe është gati në pranverë për hapjen e negociatave.

“Ne jemi të interesuar për progresin e vendit. Ne kemi punuar shumë për të shtruar rrugën, që këtë vit të arrijmë suksesin që dëshirojmë. Për sa kemi parë metodologjinë, që ka krijuar besim te të gjitha palët, dhe që përshpejton procesin dhe ofron perspektiva më të besueshme për Shqipërinë dhe Maqedoninë e Veriut, që ne të mund të ecim përpara për hapjen e negociatave. Po punojmë fort, kam shumë besim. Ne do të botojmë një raport të ri për vendin në fillim të marsit, me qëllim që të krijojmë besim te të gjitha palët,” tha Presidentja e KE duke shtuar se kanë prova që progresi është bërë.

Ndërsa Edi Rama nuk e fshehu se ishte i tronditur aq më shumë kur dihet se pritshmëritë e qeveriaë ishin, siç u shprehë ministri Arben Ahmetaj para fillimit të Konferencës së donatorëve, 300-350 milionē euro.

“Jemi ende duke përballuar tronditjen e sotme. Dua të gjej një hudhër, sepse kur merr vesh një lajm të mirë, ke frikë se mos ndodh diçka e keqe. Ndaj më lini të gjejë një hudhër njëherë, se sa të mendoj për hapjen apo jo të negociatave. Na duhet të nisim një rindërtim shumë sfidues, sepse kam dëgjuar me shumë kujdes atë që tha Presidentja e KE, që ajo çfarë rindërtohet të jetë më e mirë se ajo që humbi, me standarde të reja anti-sizmike, ekologjike, etj. Jam shumë krenar për ekipin tonë, për prezantimet. Po mendoja pse nuk jemi pjesë e BE, por nuk e kërkoj tani.”

Presidentja e Komisionit Evropian, Ursula von der Leyen, sqaroi se si do të menaxhohen këto fonde ose siç u shprehë ajo, kjo shenjë e jashtëzakonshme solidariteti me popullin shqiptar.

“Kemi rënë dakord të kemi një marrëveshje, ku do të përcaktojmë parimet e transparencës së llogaridhënies. Duam që kjo shenjë e jashtëzakonshme solidariteti me popullin shqiptar të investohet në mënyrën e duhur, transparente, llogaridhënëse dhe për këtë jemi të gatshëm të dërgojmë ekspertët tanë, për ta zbatuar në mënyrën e duhur. Marrëveshjen do ta nënshkruajmë së bashku me Ramën.”

Ndërsa Edi Rama u mundua të thotë diçka, nuk tha asgjë vetë se i porositi të mos shqetësohen:

“Bixhozi është ndaluar në Shqipëri, por pashë shumë njerëz sot që vinin baste. Dëgjova njerëz që vinin baste, se do të ishte gjithçka katastrofë, por e humbën bastin. Mos vini bast, kur bëhet fjalë për mua, qeverinë time dhe marrëdhënien tonë me botën. Pasi thanë se kjo do të ishte një katastrofë, kur kontributet po rriteshin, thanë se nuk mund t’i menaxhojmë, por ne do t’i menaxhojmë siç duhet. Ndaj ju them mos të shqetësoheni.”