Si mund të bëhen zgjedhjet në Shqipëri…

nga Agim Popoci

Pas zgjedhjeve të 6 Tetorit në Kosovë, numërimit dhe shpalljes në kohë reale të rezultateve nga KQZ si dhe pranimit të humbjes nga lideri i partisë në pushtet, në Shqipëri plasi një histeri se si Kosova na qenka model për mbajtjen e zgjedhjeve në Shqipëri!

Jo, Jo, Kosova nuk është model për Shqipërinë se si mbahen zgjedhjet sepse ka ende punë për tu bërë, por Shqipëria është model për Kosovën se si nuk duhet të mbahen zgjedhjet!

Në Kosovë Ish-Kryetari i KQZ-së nuk është bërë shef i shërbimit sekret. Kush ishte kryetar i KQZ në Kosovë shumë pak e mbajnë mend, ndërsa në Shqipëri, Fatos Klosin ca injorantë e quajnë edhe Ish-Shef i SHIK-ut, e ai e bënë ligjin edhe sot.

Kosova ka pasur shumë ministra të Jashtëm më të dobët se Shqipëria, por asnjë ministër i Jashtëm nuk ishte i biri i një krimineli komunist edhe pse ka shumë komunistë proserb në Kosovë. Asnjë ministër i Jashtëm i Kosovës nuk ka ardhur në pushtet duke akuzuar Kryeministrin dhe pushtetin e tij se i kishin rrëmbyer gruan shtatzënë një Kryebashkiaku të partisë rivale dhe i kishin prerë barkun.

Dhe, asnjë ministër i Jashtëm nuk ka përdhosur institucionin e Presidentit sikur Ditmir Bushati kur mbanë konferencë të NATO-s por nuk fton Presidentin si Komandant të Forcave të Armatosura, dhe futet me dhunë në Presidencë edhe kur Presidenti nuk e fton në një takim me Ambasadorët.

Kosova ka pasur ministra të Jashtëm shumë më të paaftë se Shqipëria por jo që gënjejnë Presidentin e Republikës dhe votojnë kundër SHBA e NATO-s, siç ishte rasti me votën shqiptare në OKB në favor të rezolutës për ndalimin e asgjësimit të armëve bërthamore.

Në Kosovë ka pasur raste kur Presidenti dhe Ministri i Jashtëm kanë qenë  të partive kundërshtare, por kurrë nuk ka pasur përplasje me emërimin ose përfundimin e mandatit të Ambasadorëve, siç ishte rasti me Ambasadorin e Shqipërisë në OSBE, Spiro Koçi, ku Ditmiri thjeshtë gënjeu, si dhe shumë raste të tjera të ngjashme si këto!.

Në Kosovë, ministri i Energjisë nuk vjedhë dhe nuk blenë vota, dhe nuk mbledhë grupe terroristësh për të trembur zonat elektorale që ta votojnë partinë në pushtet, siç bëri Damian Gjiknuri. Thjeshtë, në Kosovë një Ministër i Energjetikës është një person teknik përveç se politik!

Kosova ka pasur ministra të Shëndetësisë  edhe më kastastrofë se Ilir Beqja, por kurrë nuk ka pasur ministra që kërcënojnë me pensione dhe ilaçe që të votën për partinë në pushtet.

Kosova ka pasur deputetë më të dobët se Shqipëria, por kurrë nuk ka pasur deputetë si Pjerin Ndreu që kërcënojnë drejtora shkolle të votojnë për partinë në pushtet, ndryshe do të ikin nga detyra.

Kosova ka pasur politikanë që kanë manipuluar me vota, por ata ishin të rangut të tretë dhe ushtarë të liderëve politik, ndërkohë në Shqipëri njeriu që drejtoi qeverinë kur u shpik Dushku dhe blerja e votës, dhe u llahtaris Brukseli me manipulimet zgjedhore, vetëm e vetëm për të krijuar 2/3 në parlament në mënyrë që të zgjedhet presidenti nga partia në pushtet, sot është President i Republikës.

Kosova ka pasur shumë kryeministra më të dobët se Shqipëria por kurrë nuk ka pasur Kryeministër si Edi Rama që merr në telefon edhe një drejtoreshë shkolle dhe i gërthet në telefon, ose dhe një anëtarë të KQZ-së i cili më pas çohet nga mbledhja e Komisionit Qendror të Zgjedhjeve dhe nuk voton pavarësisht çështjes, sepse urdhërin e ka marrë nga I Madhi.

Kosova ka pasur shumë anëtarë më të lodhtë të KQZ-së se Shqipëria por kurrë nuk ka pasur as Denar dhe as Bibë. Për KQZ-në e Kosovës, Dekreti i Presidentit është Dekret dhe zbatohet ndonëse edhe aktualisht ka anëtarë të përbërjes aktuale të Komisionit në Kosovë që e urrejnë më shumë Hashim Thaçin se sa Denari mund ta imagjinojë ndërsa urren Ilir Metën.

Dhe në fund, në Kosovë, ka raste kur vota blihet dhe shitet, por jo si në Shqipëri edhe pse varfëria nuk mungon. Ndoshta këtu dhe qëndron çelësi i gjithë kësaj katrahure zgjedhore të cilën e përdor politika në Shqipëri.

Pse kjo dukuri nuk ndodhë në mënyrë masive ndër kosovarë tregon dhe fakti që Kosova u bë shtet edhe pse nën sundimin e egër serb; Ndryshe, këtë popull do ta kishte blerë Serbia dhe nuk kishte arsye të bënte luftë!