“Si ta vrasim Presidentin?”, drama në një ditë proteste
Nesër në Teatrin Kombëtar të Kosovës, TKK, do të jepet premiera e shfaqjes artistike “Si ta vrasim Presidentin”. Në të njëjtën ditë në Prishtinë do të mbahet protesta e thirrur nga Lëvizja Vetëvendosje kundër presidentit të Kosovës Hashim Thaçi për idenë e tij për korrigjim të kufirit ndërmjet Kosovës e Serbisë.
Për shfaqjen artistike “Si ta vrasim Presidentin”, ka pasur reagime të ndryshme në rrjetet sociale, duke aluduar se kjo shfaqje po bëhet në ditën për të “vrarë politikisht’, presidentin e Kosovës.
Por për këtë ide dhe këto vlerësim drejtori artistik i Teatrit Kombëtar të Kosovës, Agon Myftari ka mohuar se kjo datë ka ndërlidhje me protestën e Vetëvendosjes që do të mbahet me 29 shtator. “Jo absolutisht nuk ka lidhje me protestë, ne kemi caktuar këtë datë më herët dhe na vjen keq që ka pretendime të tilla”, tha Agon Myftari.
Myftari vlerësoi se vepra artistike “Si ta vrasim Presidentin”, në datën e 29 shtatorit është rastësi se s’ka asnjë lidhje politike.
“Ne edhe ditë më parë kemi shprehur shqetësimin tonë për keqpërdorimin që i është bërë emrit të TKK-së dhe veprës artistike “Si ta vrasim Presidentin””, tha ai.
Një veprim i tillë, është thellësisht i pamoralshëm dhe shprehë një mos respekt flagrant për artin, për teatrin si koncept dhe keqpërdorim vlerës artistike e kulturore qe cilado parti politike, e bashkë me to edhe media të kurdisura janë kanë bërë në raportimet dhe publikimet e tyre. TKK nuk ka të drejtë dhe rrjedhimisht nuk merret me asnjë agjendë apo përplasje politike sepse nuk ka as mision as vizion dhe as qellim të bëjë një gjë të tillë. Në këtë drejtim ne kërkojmë nga partitë politike dhe kushdo tjetër, të respektojnë autoritetin e Teatrit qoftë si institucion, qoftë si vlerë supreme e shprehjes artistike dhe kulturore në çdo vend të qytetëruar.
Në këtë dramë do të luajnë: Mirsad Ferati, Rabije Kryeziu, Fatmir Haliti dhe Njomza Tmava, ndërsa kësaj ekipe i janë bashkuar Petrit Bakalli – Skenograf, Vesa Kraja – Kostumografe dhe Trimor Dhomi – Kompozitor.
