Sigurimi i Shtetit s’i fik dot 33 qirinjtë e PD!
nga Agim Popoci
Me shkërmoqjen e sistemit komunist 33 vjet më parë, kur gjaku e zuri sistemin më të egër që kishte parë ndonjëherë toka shqiptare dhe kriminelët e Sigurimit të Shtetit morën dhenë drejt shteteve perëndimore me theks të veçantë Amerikës, Partia Demokratike erdhi me fjalën e lirë si shpresë e madhe se këtu edhe jetë mund të ketë!
Me instalimin e pluralizmit politik dhe pranimit fatal të sugjerimit ndërkombëtar për të shikuar nga e ardhmja duke mos u marrë me hakmarrjen, Partia Demokratike ende pa e marrë mirë pushtetin filloi të ndjejë në arteiret e saj rruazat e zeza të Sigurimit të Shtetit që filluan me shpejtësinë e rrufesë të kthehen në atdhe dhe të nisen drejtë aortave të zemrës blu!
Kjo zemër e madhe blu, duke menduar se vend ka për të gjithë, u hap jo vetëm për ata që kishin vuajtur në burgjet dhe kampet e internimit komunist, por edhe ndaj atij llumi njerëzor që nuk u pendua asnjë fije, madje sot edhe mburret me krimin ndaj popullit shqiptar që mendon ndryshe nga Partia Komuniste e Beogradit!
Por, shumë shpejtë, hetuesit, prokurorët dhe gjyqtarët e krimeve komuniste së bashku me trashëgimtarët e tyre u inkorporuan në atë që quhej shtet demokratik, por që në masën më të madhe drejtohej nga ata që dirigjoheshin nga Sigurimi i Shtetit i cili filloi të zë vend të qenësishëm në aparatin shtetëror duke vazhduar të promovonte heshtjen e të përndjekurëve politik për krimin si një vepër e së kaluarës që e kishte imponuar regjimi i kohës.
Për fat të keq, për një kohë shumë të shkurt u konfirmua se ishte shpirti i zi i Sigurimit të Shtetit që e mbajti në jetë këtë regjim komunist, por, ishte vonë sepse po ky shpirt e kishte rimarrë dhe ishte ulur këmbëkryq në fronin shtetëror.
Shumë nga arteriet e PD ishin mbushur me rruaza të zeza të Sigurimit të Shtetit, liria e pushtetit dekmokratik po asfiksohej dhe pa kaluar mirë pesë vjetë ai u gjunjëzua përballë revolucionit komunistë të vitit 1997 i cili arriti të djegë çdo gjë të ndërtuar që kishte para.
Dhe, sërish amnisti! Fatkeqësisht ashtu siç u amnistuan tmerret komuniste pas luftës së dy botërore, u amnistuan edhe ato të vitit të zi 1997 me idenë se Shqipëria me Partinë Demokratike edhe do të bëhet!
Shqipëria filloi ta rimarrë veten ashtu si edhe Partia Demokratike ringjalljen e shpresës, por ishte dhe Sigurimi i Shtetit që nuk po qëndronte kot!
Pushteti demokratik i vitit 2005 ndoshta edhe mund të kishte tjetër epilog sikur të ndryshonte në skelet dhe muskujë nga ai vitit 1992, siç mendohet sot, por shpërfillet një detaj shumë domethënës që konfirmoi pse Sigurimi i Shtetit vazhdon dhe jeton në Shqipëri!
Jo vetëm në arteriet e Partisë Demokratike, por, Sigurimi i Shtetit u kujdes që rruazat e tij të zeza të dominojnë edhe në Bankën Kombëtare të Gjakut, për të mos e përsëritur gabimin e vitit 1990!
Sa më shumë do zënin vend të përndjekurit politik dhe do ktheheshin pronat, aq më shumë do rritej dominimi i këtij shpirti të zi në aparatin shtetëror, pavarësisht se me pushtetin demokratik Shqipëria arriti të bëhet edhe anëtare e NATO-s, liberalizoj vizat dhe ndryshon mirëqënien e shqiptarëve!
Pas tetë viteve intensive të këtij zhvillimi, kur shqiptarët gëzuan edhe Rrugën e Kombit të tyre që përafroi jo vetëm ekonominë kombëtare, rruazat e zeza të Sigurimit të Shtetit arritën ti shkaktojnë pushtetit demokratik një plogështi nga e cila nuk po e merrte dot veten, dhe, u dorëzua.
Në krye të pushtetit erdhi prerja më kriminale që mund ta qëndiste Sigurimi i Shtetit, i cili nuk humbi kohë vetëm me rikthimin e nomenklaturës komuniste në krye të shtetit, por, dhe shkatërrimin e gjithë jetës demokratike që ishte krijuar dhe me ndihmën e Aleatëve!
Fillimisht u godit inteligjenca e cila u etiketua “demokratike”, më të shkolluarit u hodhën në rrugë, u shua shtresa e mesme, u blenë ata që u akuzuan oligarkë, u përçudnuan ata që kosnideroheshin të përndjekur politik, ndërsa iu kushtëzua kthimi i pronës, atyre që u ishte plaçkitur prona po nga regjimi komunist!
Kështu u krijua dhe njeriu i ri, jo më me arterie të infektuara me gjak të zi, por me arterie me gjak të zi që njohin vetëm një fajtor, Partinë Demokratike!
Ky realitet i ri arriti të prodhoj shumë anomali jetësore duke filluar nga institucionet shtetërore që do zbardhin krimet komuniste dhe drejtohen nga vetë regjimi komunist, deri te Partia Demokratike Zyrtare që do të drejtohet dhe votohet nga Sigurimi i Shtetit!
Përpjekjet e demokratëve për të rigrupuar shpirtërat e lirë rreth një Partie Demokratike që nuk dorëzohet, u sulmuan me çdo mjet dhe mënyrë, derisa Sigurimi i Shtetit sajoi dhe një betejë ligjore që do të përcaktonte dhe pronarin e partisë, i vendosur që të mos përfill themeluesit e saj, Demokratët!
Çdo tentativë ligjore për të shpëtuar atë që që mund të shpëtohej nga kthetërat e Sigurimit të Shtetit, përfundoi me masa edhe më të ashpëra që regjimi i Edi Ramës nuk i kurseu! Gjykata qëndisi një Parti Demokratike ashtu siç e mendoi Sigurimi i Shtetit, madje i krijoi një Këshill të NATO-s për të cilin u kujdes të drejtohet nga një bashkëpuntor i Sigurimit!
Rezultatin në zgjedhje i dha aq sa mund të quhej parti e shkërmoqur ndërsa tre liderët që dolën nga gjithë kjo rrëmujë ligjore komuniste, i konsideroi si një trofe që vetëm Sigurimi i Shtetit mund të prodhonte!
Në këtë kaos juridiko-social, duke u shmangur nga vrasja në emër të idealit, demokratët bënë një gabim fatal dhe i lejuan Sigurimit të Shtetit që të vras idealin demokrat të shumë bashkëmendimtarëve!
Po, sot është e vërtetë se falë propagandës komuniste ka shqiptarë që janë të bindur se ishte Sigurimi i Shtetit ai i cili krijoi Partinë Demokratike dhe liderët e saj, por, për 33 vjet, asnjë anëtar i Partisë Demokratike nuk u bind dot se ai i ishte afruar partisë së fjalës së lirë sepse e bindi Sigurimi, që filloi drejtimin e këtij shteti që nga viti i zi 1944!
Sot është e vërtetë se ka demokratë, ish-të përndjekurë dhe pronarë të plaçkitur nga regjimi komunist që u zhgënjyen nga Partia Demokratike, por, ideali i tyre vazhdon të frymoj sepse gjaku nuk është ujë!
Dhe, në fund, sot, ndonëse e ka krijuar idenë se e shkërmoqi partinë e fjalës së lirë, ndonëse është i bindur se nga 1 sot krijoi 3 parti, ndonëse mendon se është ai i cili vendos për lidershipin e PD, Sigurimi i Shtetit as sot nuk i fik dot 33 qirinjtë e tortës, në ditëlindjen e Partisë Demokratike!
Sot e mot, torta, qirinjtë dhe ceremonia e ditës së lindjes, janë pronë vetëm e demokratëve, pavarësisht se kë blenë dhe kë shet Sigurimi i Shtetit; Thjeshtë sepse nuk e ka kuptuar atë që është më kryesorja:
Sigurimi i Shtetit nuk e ndryshon dot njeriun që ka lindur të jetë i lirë. Dhe, shqiptarë të tillë do të ketë, sa të jetë jeta!
