Sigurimi sipas çmimit të automjetit

Banka Qendrore e Kosovës, BQK, pritet që gjatë muajit gusht të marrë vendim në lidhje me kërkesën e kompanive të sigurimeve për rritjen apo jo të çmimeve për sigurimin e automjeteve. Mësohet se opsioni më i pranueshëm dhe që mund ta marrë dritën e jeshile, është që makinat më të shtrenjta të paguajnë sigurim më të lartë.

Rritja e çmimeve për sigurim të automjeteve është temë e përfolur kohëve të fundit. Mirëpo si BQK ashtu edhe Shoqata e Sigurimeve janë të rezervuara të japin më shumë hollësi në lidhje me këtë çështje.

Zëdhënësi i BQK-së, Kushtrim Ahmeti, tha për Radio Kosova se nuk është marrë ndonjë vendim për këtë gjë.

“Aktualisht nuk ka rritje të çmimeve të sigurimit të automjeteve. Ashtu siç ka bërë edhe në të kaluarën, për çdo vendim të ri Banka Qendrore e Republikës së Kosovës do ta njoftojë publikun,” tha Ahmeti.

Edhe Shoqata e Sigurimeve të Kosovës ka dërguar përgjigje me shkrim ku nuk ofron ndonjë risi. Shoqata potencon se çështja e ndryshimit të çmimit të sigurimit është çështje individuale e secilës kompani të sigurimit dhe se nuk është në dijeni nëse ka ndonjë kërkesë të tillë të paraqitur nga siguruesit. Por Radio Kosova mëson se kompanitë e sigurimeve kanë dorëzuar në BQK kërkesën për rritjen e çmimeve.

BQK pritet të vendosë në muajin gusht në lidhje me çështjen, thotë burimi. Çmimet e sigurimeve mund të rriten deri në rreth 30% për automjete të reja, e automjetet e lira do të kenë çmim më të lirë. Sipas zyrtarëve, nuk ka kuptim që një makinë me vlerë 100 mijë euro të paguajë sigurim të njëjtë sikur një Golf 2. Kjo formë, mësohet se  është e pëlqyeshme si nga shoqatat e sigurimeve, e po ashtu e pranueshme edhe nga BQK