Sigurohet vaksina anti-covid, Maqedoni e Veriut: Vaksinimi falas!

Vaksina  kundër koronavirusit e Oxfordit për qytetarët e Maqedonisë së Veriut do të jepet falas, ndërsa dozat për vaksinim janë siguruar nga Polonia. Lajmin e ka bërë të ditur Ministria e Shëndetësisë duke sqaruar se Maqedonia e Veriut si shtet jo anëtar i BE-së, nuk mund të furnizohet drejtpërdrejt nga prodhuesi, por vaksinën duhet ta  blejë nga shtete që do të furnizohen të parat.

“Shtetet anëtare të Bashkimit Evropian kanë nënshkruar marrëveshje dypalëshe me kompaninë që punon për vaksinën Oxford ‘Astra Zeneca’. Ndërkohë, ne morëm një ofertë nga Polonia që të sigurojë një sasi të përshtatshme edhe për ne, sepse nuk do të kemi mundësinë për një marrëveshje dypalëshe. Përfundimisht, me dy mekanizma sigurojmë që vaksina të jetë në dispozicion të qytetarëve tanë, pa pagesë,” janë shprehur në Ministrinë e Shëndetësisë, raporton Alsat e cila nuk mori përgjigje në pyetejet se sa doza të vaksinës do të sigurohen, cili është buxheti për blerjen e vaksinës, me çfarë çmimi do të blehen, kur planifikohet të nisë procesi i vaksinimit dhe sa herë duhet  të vaksinohet një qytetarë!

Ndryshe, rasti i parë me koronavirus në Maqedoninë e Veriut u regjistrua më 26 shkurt. Deri më sot janë infektuar 13.194 persona, prej të cilëve 118 gjatë 24 orëve të fundit.

Betejën me koronavirusin e kanë humbur 554 qytetarë duke përfshirë edhe 3 persona gjatë 24 orëve të fundit. Bëhet fjalë për një 64 vjeçar nga Tetova, një 74 vjeçar nga Struga dhe një 84 vjeçar nga Shtipi.

Gjatë 24 orëve të fundit u shëruan 124 pacientë duke çuar numrin në 9.752 numrin e të shëruarve me COVID-19.

Aktualisht janë 2.888 raste aktive.