Simahori!

Kryetari i Lidhjes Demokratike të Kosovës, Lumir Abdixhiku, ka refuzuar një takim konsultimi për formimin e qeverisë me Kryetarin e partisë fituese në zgjedhjet parlamentare të 9 shkurtit, Lëvizjes Vetëvendosje, Albin Kurti, me arsyetimin se njeriu që e kishte ftuar në takim e kishte fyer LDK-në!

Fjalët e thëna ndaj LDK-së, sipas Lumir Abdixhikut, kanë peshë, dhe, fjalët e tyre dhënë qytetarëve kanë peshë, peshë të cilën ai nuk e shtjellon si lider politik që është duke refeuar ndonjë teorie të Samuel Huntigtonit apo Henry Kissingerit, por, thotë se fjala e dhënë ka peshën e besës, dhe, besë do të ketë!

Pra, i referohet Kanunit të Lekë Dukagjinit!

Pavarësisht arsyetimit të tij të gjatë pse e refuzon takimin me Albin Kurtin, Kanuni jonë bujar ka zgjidhje edhe për sikletin që ka Lumir Abdixhiku ose ai burrë i madh që e këshillon kaq mbrapsht!

“Hajvanati”

“E keni parë çfarë rrenash prej premtimeve kanë dhënë, thanë se buxheti i shtetit do të bëhet më i madh se bruto produkti vendor, çfarë hajvanash, ose jepnin premtime për koeficient më shumë se në programin e tyre, çfarë hajvanash. Ka kaluar koha e hajvanatit, e kanë marrë vesh sonte,” ishte kjo fyerja e Albin Kurti që ma shumë tronditi batonë e buzhalë që krekosen si strategë mediatik të Kosovës dhe e bënë çorapë jo vetëm politikën në vend, se sa vetë protagonistët politikë që kishin neveri por e shpërfillën fjalorin e përdorur nga Kurti!

Nëse kjo e ka fyer Lumir Abdixhikun sot vetëm mund të konfirmohet se si doktor shkence në Ekonomi, ai vërtetë është HAJVAN, nëse është dakord me premtimin se “buxheti i shtetit do të bëhet më i madh se bruto produkti vendor”.

Por, Lumir Abdixhiku që refuzon Albin Kurtin për fjalën e dhënë dhe mendon të bëjë koalicion qeverisës sepse nuk ndihet i fyer me ata që e përmbytën në gjak LDK-në, nga Ahmet Krasniqi deri tek Tahir Zemaj, ka një problem serioz, që tejkalon përmasat politike!

“Sado që unë dhe LDK nuk udhëhiqemi nga inati; sado që ne besojmë në dialog, bashkëpunim e komunikim njerëzor e politik; një takim i tillë – madje edhe konsultativ – do të ishte kapërcim fatal i dinjitetit njerëzor dhe politik.

Mes ‘hajvanatit’, ‘mbytjes së LDK-së’, ‘bashkëpunëtorëve të Serbisë’, mes moçalit të madh të pështymave ndaj nesh – unë, LDK dhe votuesit tanë – nuk e gjejmë veten as për konsultim.

Sepse fjalët, si edhe bindjet, kanë peshë,” thotë lideri i LDK-së në sqarimin e tij përmes rrjetit social Facebook, por, për cilën peshë e ka fjalën, gjetja është interesante!

“Fjalët e thëna ndaj nesh kanë peshë. Dhe fjalët tona – ato që u kemi dhënë qytetarëve tanë, atyre që nuk joshen nga spektakli i përçarjes por që besojnë se shteti ndërtohet me respekt e dinjitet – kanë peshën e fjalës së dhënë. Peshën e besës. Besë do të ketë!”

“Fiala mort sbân”

Që Besë do të ketë, kjo do të ndodhë edhe pa Lumirin, edhe pa mentorin e tij Isën, pa idhullin e tij Edi Ramën, pa strategun e tij Buzhalën, i cili i thotë se i ka shtuar 70 mijë vota, dhe pak rëndësi ka se LDK ishte dhe është parti e tretë në Kosovë; E madje që mos ta vras shumë mendjen Lumiri, Besë do të ketë edhe pa Kryeministrin e ardhshëm të Kosovës, pavarësisht se si e ka emrin!

Por, meqë përgjigjen për ftesën e Albin Kurtit e gjeti tek Kanuni jonë bujar, para se të shkonte te BESA që është te Libri i Dhetë – NYE I NJIQINDENJIZETEDYTË, nuk kishte nevojë të bëhej gaz i botës sepse tek Libri i Shtatë – NYE I TETËDHETEGJASHTËT është Fjala, dhe thotë shkurt e shqip, që nuk ka Kod modern penal e civil që mund ta hedhë poshtë:

“Fiala mort sbân”. “Shtriga në giak nuk bien”. “Goia s’qet kend në giak”

Për kaq pak logjikë nuk i duhet askujt as batonë e as buzhalë, pra, as Lumir Abdixhikut sikur të jetë nxitur edhe nga Devollët e etur për aq shumë për pushtet!

Aq më shumë kur në ditën kur Lumiri refuzon partinë fituese në zgjedhje, LVV, nga partia e saj simotër gjermane, CDU, vjen lajmi se ka pranuar kompromiset dhe do të formoj koalicionin qeveritar edhe me SPD-në, me të cilën përveç se atdheu i përbashkët – Gjermania, nuk e lidhë asgjë!

Në fund, meqë Kryetari i LDK-së, Lumir Abdixhiku, e dha fjalën e fundit dhe refuzon këshillë tjetër çfarëdo qoftë ajo, koalicioni me të cilin ka synuar të vjen në pushtet, përveç se nuk i jep postin e Kryeministrit, fjalë kjo që i dha qytetarëve dhe ka peshën e besës, me sqarimin e tij pse refuzon takimin me Albin Kurtin i ka rezervuar vetes vetëm një post në qeverinë që do formoj me PDK-në, AAK-në dhe shkijet e Vuçiçit, dhe, është përkufizuar jo në Kushtetutën e Kosovës, por, në Librin e Dhetë – NYE I NJIQINDENJIZETËT – të Kanunit të Lekë Dukagjinit:

“Simahori – §.850. Simahuer âsht aj, i cilli i ep dorë dorërasit, tuj i ndihmue a në vrasë a në viedhni a në të kryem të çdo mbrapshtije tjeter!”

Ndërkohë për të gjithë ata që kanë harruar rezultatin e certifkuar të Komisionit Qendror të Zgjedhjeve, të zgjedhjeve të 9 shkurtit në Kosovë meqë kanë kaluar plotë 12 ditë, Lëvizja Vetëvendosje rezultoi e para me 42.30 për qind, PDK me 20.95 për qind, LDK ka 18.27 për qind dhe AAK -Nisma me 7.06 për qind.

Dhe, në situatën aktuale gjeopolitike në të cilën gjendet Kosova dhe jo vetëm, me këtë rezultat të certifikuar nga KQZ, koalicioni i vetëm qeverisës që sjell stabilitet para vendimeve historike që priten, ishte dhe mbetet, LVV-PDK!