Sistemi 2.5 mln euro për gradat akademike, KPP “ok” AKSHI-t të anulojë tenderin, shkak pamundësia
Procedurat e prokurimit që lidhen me sistemet e Teknologjisë së Informacionit duket se kanë hyrë në një zinxhir problemesh që nuk mbarojnë.
I fundit në këtë listë është bërë ai për sistemin elektronik të titujve akademikë, gradat shkencore dhe revista shkencore me një fond limit 250 milionë lekë apo 2.57 milionë euro për të cilin Agjencia Kombëtare e Shoqërisë së Informacionit ka kërkuar pranë Komisionit ë Prokurimit Publik që të anulohet.
Ky tender më herët i ankimuar pranë këtij institucioni rezultoi me një sërë rekomandimesh që duhet të reflektoheshin nga AKSHI por që mesa duket për shkak të zhvillimeve të fundit kjo ka qenë e pamundur. Në këto kushte AKSHI ka kërkuar nga KPP që kjo procedurë të bëhet në një moment tjetër për shkak se aktualisht është e pamundur që reflektohen këto kërkesa.
“Referuar shkresës, të dorëzuar nga autoriteti kontraktor pranë Komisionit të Prokurimit Publik, konstatohet se autoriteti kontraktor në fazën në të cilën ndodhet procedura e ka të pamundur reflektimin e detyrave të lëna nga ana Komisionit në vendimin 204/2026, ndodhur në këto kushte
Komisioni gjykon se nëse autoriteti kontraktor ka vijuar me hapat e mëtejshëm të procedurës së prokurimit objekt ankimi pa pritur lejimin e Komisionit, dhe e ka të pamundur reflektimin e detyrave të lëna nga Komisioni në vendimin 204/2026, duhet të marrë masa që të anulojë procedurën e prokurimit publik objekt ankimi dhe në rishpalljen e saj të ketë në konsideratë të gjitha përcaktimet e bëra nga Komisioni në lidhje me këtë procedurë prokurimi, duke vënë në dijeni Komisionin me dokumentet e reja të procedurës së prokurimit.
Sepse e vetmja mënyrë për të mbrojtur interesin e ligjshëm të operatorëve ekonomikë ankimues nga njëra anë dhe interesin publik nga ana tjetër, është lejimi i autoritetit kontraktor për vijimin me anulimin e saj dhe ripublikimin e modikimeve në përputhje me konstatimet e bëra nga Komisioni Prokurimit Publik për këtë procedurë prokurimi” thuhet në vendimin e KPP.
Në fund ai ka nënvizuar se AKSHI lejohet të anulojë procedurën por duhet që me rishpalljen e saj të jenë reflektuar detyrat e lëna më herët./Monitor/
