Situata e sigurisë në Ballkan, Vuçiç: Seriozisht e brishtë!
Presidenti i Serbisë, Aleksandar Vuçiç, tha sot se situata e sigurisë në Ballkan është seriozisht e brishtë dhe se Serbia po përpiqet të ruajë paqen dhe stabilitetin, si dhe sigurinë e të gjithë qytetarëve të saj.
Pas mbledhjes së Qeverisë Serbisë ku ai ishte prezent, Vuçiç tha se u diskutua për situatën aktuale të sigurisë në vend dhe rajon, veçanërisht për sfidat e sigurisë në Kosovë dhe në Bosnje Hercegovinë.
“Diskutuam edhe për të gjitha aspektet e protestës së paralajmëruar më 15 mars,” tha Vuçiç përmes rrjetit social Instagram sapo përfundoi mbledhja e Qeverisë Serbisë.
Më herët, presidenti serb kishte deklaruar se në protestën dhe bllokadën e paralajmëruar nga studentët për 15 mars në Beograd, ai pret që opozita të organizojë dhunë të madhe.
Pa dhënë detaje dhe prova për këto pretendime, Vuçiç tha se të gjithë ata që do të marrin pjesë në këtë dhunë, do të arrestohen.
Tubimet masive të organizuara deri më tani nga studentët në disa qytete të mëdha në Serbi, duke kërkuar përgjegjësi për vdekjen e 15 personave nga shembja e strehës së Stacionit Hekurudhor në Novi Sad, kanë qenë paqësore dhe nuk janë shënuar incidente.
Vuçiç tha se tema e mbledhjes së Qeverisë ishte edhe ndikimi i bllokadave në Serbi mbi gjendjen e ekonomisë.
“U ndalëm edhe te gjendja e ekonomisë në dritën e protestave aktuale, si dhe dëmi që kanë shkaktuar këto ngjarje, i cili reflektohet në uljen e investimeve dhe sfida të tjera për ekonominë,” tha Vuçiç duke shtuar se është arritur një pajtim për marrjen e masave urgjente për t’i zbutur pasojat dhe për të mbështetur sektorët ekonomikë të prekur nga këto rrethana.
Me bllokadat dhe protestat prej disa muajsh në Serbi, studentët dhe qytetarët që i mbështesin, po kërkojnë publikimin e të gjithë dokumentacionit mbi rindërtimin e Stacionit Hekurudhor të Novi Sadit, për të përcaktuar përgjegjësinë për tragjedinë, ndjekjen penale të sulmuesve ndaj pjesëmarrësve të protestave të deritashme, si dhe ndërprerjen e procedimeve kundër të arrestuarve në demonstrata.
Qeveria pretendon se i ka përmbushur të gjitha kërkesat e studentëve, ndërsa një grup ekspertësh i formuar nga Senati i Universitetit të Beogradit, përmes një raporti e ka mohuar këtë pretendim të qeverisë serbe.
