Situata me COVID-19, Manastirliu te Meta: Strategjia jonë ka nevojë për bashkëpunimin e qytetarëve

Presidenti i Republikës Ilir Meta sot në takim me ministren e Shëndetësisë dhe Mbrojtjes Sociale, Ogerta Manastirliu, u informua nga kjo e fundit se në zbatim të strategjisë së hartuar dhe propozimeve të Komitetit Teknik të Ekspertëve, janë marrë masat për sigurimin e mjeteve të mbrojtjes personale, rritjen e kapaciteteve të testimeve, kapaciteteve spitalore dhe burimeve njerëzore ndërkohë numri i të prekurve me COVID-19 në vendin vijon të jetë i lartë për çfarë shfaqi shqetësim edhe dje presidenti.

“Strategjia që po ndjekim ka nevojë për bashkëpunimin e qytetarëve për të përballuar situatën e shkaktuar si pasojë e COVID-19. Vetëm nëpërmjet zbatimit të masave dhe protokolleve, nëpërmjet shembullit personal, do të mundemi t’ia dalim së bashku, edhe në këtë fazë të pandemisë,” tha Manastirliu ndërsa Meta e siguroi për solidaritetin dhe mbështetjen e tij të plotë për institucionet shëndetësore.

“Duke shprehur falënderim dhe mirënjohje për të gjithë mjekët, infermierët dhe personelin mbështetës që janë duke shërbyer me profesionalizëm dhe përkushtim maksimal në vijën e parë të frontit, theksoi rëndësinë e mbështetjes së sektorit të shëndetësisë me buxhetin e duhur, si dhe nevojën e rritjes së masave mbrojtëse për mjekët,” tha Meta duke apeluar për rëndësinë e ndërgjegjësimit të qytetarëve për respektimin e udhëzimeve të bëra publike, për ruajtjen e distancave fizike dhe mbajtjes së maskave, veçanërisht me afrimin e pikut të sezonit të ri turistik.

Presidenti Meta dhe Ministrja Manastirliu me këtë rast theksuan se është me rëndësi jetike rritja e efikasitetit të masave mbrojtëse, përmes ndërgjegjësimit, transparencës, gjithëpërfshirjes dhe rritjes së frymës së bashkëpunimit, pasi objektivi madhor i përbashkët duhet të jetë vetëm mbrojtja e shëndetit të qytetarëve dhe ekonomisë kombëtare.