“Situatë dramatike”/ Lulzim Basha me Aleatët, 90 minuta me Presidentin e Republikës

Pas ftesës që Presidenti i Republikës i bëri kryetarëve të partive të Opozitës së Bashkuar në situatën dramatike në të cilën ndodhet vendi, sot në Presidencë u zhvillua një takim për 90 minuta i Ilir Metës me Lulzim Bashën dhe Aleatet e tij.

Në fund të takimit, Kryetari i LZHK, Dashamir Shehi, tha se Presidenca dhe Lulzim Basha do të dalin me një deklaratë ku do të zbardhen detajet mbi diskutimet e zhvilluara në Presidencë.

“Presidenca do të dalë vetë më një deklaratë të saj. Edhe zoti Basha do të mbajë një deklaratë më vonë, pasi të mbarojë takimin me ministrin e Jashtëm të Suedisë. Më mirë me ato letrat zyrtare që të mos bëhet rrëmujë,” tha Dashamir Shehi.

Mësohet se në takim Presidenti ndau shqetësimet me Opozitën e Bashkuar për atë që po ndodh sipas tij me Gjykatën Kushtetuese dhe kërkoi reagimin e faktorit ndërkombëtar për këtë gjë. Ai kërkoi gjithashtu angazhimin e opozitës për reformën zgjedhore ndërsa nuk përjashtoi mundësinë e shpërndarjes së parlamentit nëse vijohet me të njëjtin skenar për Gjykatën Kushtetuese.

Ndryshe, tri ditë më parë, Presidenti i Republikës iu drejtua me një ftesë kryetarëve të partive të Opozitës së Bashkuara për një takim urgjent pas krizës politike  që u krijua.

“Nisur nga situata dramatike, në të cilën ndodhet vendi dhe pasojat e saj të papranueshme, ju ftoj juve dhe të gjithë kryetarët e Partive të Opozitës së Bashkuar në një takim, në një kohë sa më të shpejt,” thuhej në ftesën që Presidenti i Republikës Ilir Meta i dërgoi Lulzim Bashës dhe Aleatëve të tij.