Situatë dramatike në kufi, Basha: Braktisja e qytetarëve, papërgjegjshmëri çnjerëzore

Situata e shqiptarëve të mbetur në pikat kufitare është dramatike, konstaton Kryetari i Partisë Demokratike, Lulzim Basha, duke kërkuar ndërhyrje urgjente të qeverisë për të lejuar kthimin menjëherë në shtëpi të tyre, ndërsa braktisja e qytetarëve për liderin e opozitës është papërgjegjshmëri çnjerëzore.

“Situata e qytetarëve shqiptarë në pikat e kalimit të kufirit është dramatike dhe kërkon ndërhyrje urgjente. Qeveria të lejojë kthimin menjëherë në shtëpi të qytetarëve që prej 48 orësh mbahen peng në rrugë në pikat e kalimit të kufirit midis Shqipërisë dhe Greqisë e Malit të Zi,” thekson Lulzim Basha në reagimin e tij përmes rrjetit social Twitter duke përfunduar:

“Braktisja e qytetarëve është papërgjegjshmëri çnjerëzore. Asnjë shtet në botë nuk pengon qytetarët e vet të futen në atdheun e tyre dhe të shkojnë në shtëpinë e tyre.”

Ndryshe, në pikat kufitare me Greqinë dhe Malin e Zi, prej 48 orësh shumë qytetar vazhdojnë të qëndrojnë në rrugë pasi vazhdon të jetë në fuqi vendimi i shtetit shqiptar për ndalimin e hyrjes në Shqipëri.