S’ka diskutim me PD për Reformën në Drejtësi, Rama: Bashkëqeverisje, duhet t’u japim shansin…

Pas mbledhjes së Kryesisë së PS, Kryeministri Edi Rama foli për çështjet e diskutuara, analizën e zgjedhjeve të 25 Prillit, qëndrimin mbi Reformën në Drejtësi dhe bashkëpunimin me PD, bashkëqeverisjen si dhe vijën e kuqe që do të garantojë kalimin në një nivel tjetër të vetë cilësisë dhe të qasjes së administratës shtetërore.

“Një proces tjetër të transformimi të brendshëm dhe hapjeje dhe në bazë të disa vendimeve puna në territor do të zhvillohet paralelisht për analizat e rezultateve qendër për qendër, për të verifikuar cilësinë e përfshirjes të gjithë anëtarëve të PS në zgjedhje në raport me rezultatet dhe njëkohësisht për ta hapur partinë për prurje të reja nga shoqëria pavarësisht moshës dhe për të krijuar një bazë të re për të ecur më tutje,” tha Edi Rama dhe ndonëse shqiptarët e kanë të qartë se punësimi në baza partiake vazhdon dhe madje është më i fortë ai këmbënguli edhe sot se nëse në shërbimin civil kemi garantuar tanimë që proceset e rekrutimeve kalojnë në kanale ligjore përmes konkurseve të Departamentit të Administratës Publike, në pjesën tjetër të administratës kemi një problematikë serioze.

“Në radhë të parë me të gjithë familjen tonë politike në territor është një vijë e kuqe e cila është vendosur fortë në Kongresin e partisë dhe do të thellohet në vijimësi është se punësimet dhe drejtoritë nuk janë pronë e PS. Janë pronë e popullit shqiptar dhe janë funksion i qeverisë dhe i gjithë strukturave ekzekutive të Republikës së Shqipërisë bazuar në kushtet dhe ligjet në fuqi. Ta kenë të qartë të gjithë këtë gjë. Kjo nuk është propagandë, është vija ndarëse që do na garantojë kalimin në një nivel tjetër të vetë cilësisë dhe të qasjes së administratës shtetërore në raport me publikun. Nëse në shërbimin civile kemi garantuar tanimë që proceset e rekrutimeve kalojnë në kanale ligjore përmes konkurseve të Departamentit të Administratës Publike, në pjesën tjetër të administratës kemi një problematikë serioze të trashëguar në 30 vjet, por duhet ta qasim me forcë dhe vendosmëri.”

Derisa ishte i prerë se për Reformën në Drejtësi nuk do të ketë diskutime me opozitën, pasi ajo është një çështje kombëtare e bazuar te partneriteti me SHBA dhe BE, për bashkqeverisjen tha se në qeveri ne nuk na kanë sjellë thjesht votat e anëtarësisë sonë por të shumicës dërrmuese të shqiptarëve e atyre duhet t’u japim shansin të përfshihen në familjen tonë politike duke thyer barriera.

Lidhur me zgjatjen e organeve të vettingut dhe nëse ka marrëveshje, Kryeministri Edi Rama sqaroi:

“Kjo është një domosdoshmëri që vjen si rezultat i një procesi që ka treguar se sa i vyer është për pastrimin e llumit të sistemit të drejtësisë dhe ky proces s’mund të ndërpritet. Reforma në drejtësi është një reformë e bazuar te një partneritet i ngushtë dhe i padiskutueshëm me aleatët tanë strategjikë, SHBA dhe BE. Reforma në Drejtësi s’është për t’u negociuar, por për t’u kryer. Është shumë e qartë të gjithë që kthim mbrapa nuk ka dhe kush i bie ndesh Reformës në Drejtësi i bie ndesh të ardhmes së vendit. Reforma në Drejtësi s’është kërkesë partiake, por historike, kombëtare, për të gjithë fëmijët e këtij vendi, ndërsa të tjerat janë çështje që do diskutohet,” tha Rama duke u shprehur qartë se PS.është të gatshme të diskutojë çdo gjë me PD ashtu si dhe për bashkëqeverisje.

“PS është në një proces reflektimi se proceset e reflektimit ne na kanë garantuar që të qëndrojmë në lartësinë e pritshmërive të publikut, na kanë ndihmuar edhe të kuptojmë se vetëpërmirësimi është domosdoshmëri për një forcë politike që merr përsipër të drejtojë vendin.

Ne jemi sot përsëri në qeveri si një forcë e vetme por ne nuk do e harrojmë për asnjë moment se në qeveri ne nuk na kanë sjellë thjesht votat e anëtarësisë sonë por të shumicës dërrmuese të shqiptarëve e atyre duhet t’u japim shansin të përfshihen në familjen tonë politike, duke thyer barriera që koha i vendos dhe inercia i mban aty, e ti japim mundësi shqiptarëve të ndihen mirë për sa na takon jo se ne i bëjmë mirë të gjitha gjërat as se ne nuk bëjmë gabimet tona, por se bëjmë gjithmonë më të mirën tonë që më e mira të bëhet dhe për të tjerët.”

I pashmangshëm ishte interesi i gazetarëve për satelitët për të cilët Kryeministri Edi Rama foli dje në parlament.

“Kini durim, qeshni sepse e qeshura shëndet është dhe mirë i bën të gjithëve. Shqipëria do të ketë satelitë dhe do i ketë shpejt për të forcuar kontrollin mbi territorin e saj, do ketë dhe dronë inteligjentë që do na ndihmojnë për ta çuar vendin në një nivel tjetër nga aspekti i administrimit të territorit të vet. Këto janë mjete të një teknologjie të re që garantojnë një monitorim të territorit për shumë gjëra, që nga kufijtë, tek ndërtimet që kryhen në territor, tek monitorimi i informacionit që i duhet strukturave të shtetit për luftën kundër trafiqeve.

Patjetër për të çuar drejt zerimit përpjekjet për kultivimin e bimëve narkotike, për të mbjellat e bujqësisë dhe natyrisht për të luftuar në mënyrë cilësore krimin e organizuar. Duke pasur në dispozicion këtë arsenal për të zhvilluar marrëdhëniet në territor që shpesh herë komprometohen nga inspektorë, punonjës të korruptuar. Nuk do bëjmë asgjë që ndodh për herë të parë në Shqipëri. Nuk ka nevojë të jesh një vend super i zhvilluar për të bërë një kapërcim epokal. Shqipëria do i ketë satelitët e saj, do i ketë shpejt, ashtu sikundër dhe dronët inteligjentë dhe do rrisë në mënyrë eksponenciale kapacitetet e mbrojtjes së territorit. Përdorimi i mjeteve, për çështje që kanë të bëjnë me punët civile të vendit dhe luftën kundër krimit të organizuar. Nuk do jenë për çështje ushtarake,” tha Kryeministri Edi Rama ndërsa e kishte të gatshme përgjigjen në pyetjen nëse më mirë është ujë 24 orë apo satelitë në hapësirë: 

“Po t’ju them që satelitët lidhen dhe me ujin 24 orë ça do thoni ju? Të gjitha bashkë, ideja meqë s’kemi ujë 24 orë në të gjithë territorin, nuk duhet të kemi satelitë për territorin është e gabuar. Do kemi kontroll të plotë dhe mbi mjedisin. Ne na duhen sy inteligjentë të një kapaciteti që i tejkalon kapacitet njerëzore për të pasur në kohë reale informacion për kontrollin e territorit tonë.”