S’ka firmosje të Planit të BE, Kurti: Pala serbe s’ishte e gatshme! Vuçiç: Kurti nuk ishte i gatshëm!

Propozimi i Bashkimit Evropian për normalizimin e marrëdhënieve Kosovë-Serbi nuk u firmos në takimin BE-Kurti-Vuçiç i cili u zhvillua në Bruksel ndërsa palët pas takimit dolën me tre qëndrime të ndryshme me lajmin e vetëm se nga ky takim do të dal Dokumenti me 10 Pika i cili nuk do të diskutohet më dhe as nuk do të ndryshoj, por, pritet të firmoset nga mesi i muajit mars!

Kështu Përfaqësuesi i Lartë për Politikë të Jashtme dhe Siguri, Josep Borrell, pas përfundimit të takimit me kryeministrin Albin Kurti dhe Presidentin e Serbisë, Aleksandar Vuçiç, tha se dy liderët kanë bërë progres dhe janë zotuar që të zbatohet ajo çfarë është nënshkruar në Bruksel.

“Presidenti Vuçiç dhe kryeministri Kurti sot janë pajtuar se nuk nevojiten diskutime të tjera sa i përket propozimit evropian që e ka titullin ‘Normalizimi i marrëdhënieve Kosovë-Serbi,” tha Borrell, sipas të cilit ky plan do të publikohet nga BE.

Kjo marrëveshje, tha Borrell, mbi të gjitha është për qytetarët e Kosovës dhe Serbisë, pasi ofron mundësi të mira për lëvizje të lirë, tregti të lirë pa burokracitë e deritashme ndërsa për serbët në Kosovë kjo do të thotë më shumë siguri dhe përshtatshmëri dhe më shumë të drejta.

Palët, tha Përfaqësuesi i Lartë për Politikë të Jashtme dhe Siguri, Josep Borrell, kanë shprehur gatishmërinë për zbatimin e marrëveshjeve të arritura.

“Ata shprehën gatishmërinë e tyre për të zbatuar marrëveshjen, porse nevojiten ende negociata tjera për të përcaktuar modalitetet. Diplomacia ecajake do të vazhdojë. Në mes të muajit të ardhshëm do të ftojë dy liderët për një takim tjetër, për finalizimin e diskutimeve.”

Kurti dhe Vuçiç “nuk ishin të gatshëm”

Pas përfundimit të takimit, Presidenti i Serbisë, Aleksandër Vuçiç, tha se nuk ka pasur marrëveshje me kryeministrin e Kosovës ndërsa shtoi se ishte Albin Kurti ai i cili nuk ishte i gatshëm ta pranoj Asociacionin.

“Një takim i vështirë dhe besoj se do të ketë shumë takime në periudhën e ardhshme. Në takimin e radhës do të shihemi më 18 mars në Maqedoninë e Veriut, kur Borrell do të vizitojë Ballkanin Perëndimor. Kurti nuk është i gatshëm ta pranojë Asociacionin tash, nëse do të jetë i gatshëm ta pranojë në të ardhmen të shohim,” tha Vuçiç duke shpresuar të gjendet marrëveshja.

“Kam frikë se do të ngelim në këtë çështje. Besoj se do t’i tejkalojmë mospajtimet dhe do të punojmë në atë që e kemi quajtur zbatim,” tha Vuçiç duke këmbëngulur se në rend të parë duhet të jetë Asociacioni.

Ndërkohë Kryeministri Albin Kurti fajësoi palën serbe se nuk ishte i gatshëm të firmos Propozimin e Bashkimit Evropian por ndryshe nga Presidenti i Serbisë sqaroi se palët janë dakord me Planin Evropian dhe si i tillë ai nuk do të ndryshoj dhe do të publikohet pas pak minutave.

“Sot patëm një takim pozitiv konstruktiv në Bruksel. Ky takim ishte konfirmim që propozimi evropian është i pranueshëm dhe i pandryshueshëm. Unë qysh më herët pata thënë se është bazë e mirë dhe platformë solide për ecje para. Tash ecja përpara do të jetë për planin e zbatimit. Do të ketë edhe diplomaci fluturuese po edhe takim të radhës të nivelit të lartë kah mesi i muajit të ardhshëm. Unë i falënderoj z. Borrell dhe z. Lajçak për punën që kanë bërë deri më tash dhe besoj se jemi në rrugë të mbarë dhe njëpasnjëshme të normalizimit të marrëdhënieve për fqinjësisë së mirë evropiane,” tha Kurti duke e konsideruar si dëm faktin që sonte nuk është nënshkruar asgjë lidhur me atë për të cilën palët janë pajtuar.

“Është marrëveshje që plotësisht vendos barazi të palëve, është marrëveshje e simetrisë e fqinjësisë së mirë e edhe bashkëpunimit në të ardhmen, në mënyrë demokratike e evropiane gjithmonë. Nuk kam nënshkruar, sepse pala tjetër nuk ishte e gatshme të nënshkruaj. Kam shprehur gatishmëri e interesimin tim të nënshkruaj këtë tekst, por pala tjetër nuk ishte e gatshme, edhe pse u pajtua.”

Në pyetjen e gazetarëve se a do të zbatohet Asociacioni me këtë Plan, Kryeministri Kurti shtoi:

“Ajo është fjalia e fundit, praktikisht e nenit të fundit dhe për këtë gjë tash jam përgjigjur!”