S’ka marrëveshje për koalicion, çelësi “kryetari i parlamentit”
Lëvizja Vetëvendosje dhe Lidhja Demokratike e Kosovës sërish nuk kanë arritur marrëveshje për koalicion qeverisës ndonëse kryetari i LVV-së, Albin Kurti dhe ai i LDK-së, Isa Mustafa, u takuan mbrëmjen e sotme në praninë e përfaqësuesve të vendeve të Quint-it dhe përfaqësueses së BE-së në Kosovë.
Lideri i Lëvizjes Vetëvendosje, Albin Kurti, raporton RFE, tha pas takimit se për një marrëveshje ndërmjet partisë që ai drejton dhe Lidhjes Demokratike të Kosovës, nevojitet përafrim i dyanshëm. Siç ka thënë ai, LDK-ja ka qenë këmbëngulëse në propozimin e saj të datë 8 janar, që të marrë postin e kryetarit të Parlamentit të Kosovës.
“Ne jemi afruar, por në anën tjetër ka insistim vetëm në ofertën e 8 janarit, në stilin ‘merre ose lëre’. Me qasjen ‘merre ose lëre’ nuk mund të arrijmë marrëveshje. Unë përpjekjet nuk do t’i ndali në shndërrimin e ndryshimit politik të 6 tetorit në ndryshim institucional në Republikën e Kosovës”, tha Kurti duke përfunduar:
“Populli e ka thënë fjalën e vet. Interesimi dhe gatishmëria ime kurrë nuk ka qenë më e madhe për marrëveshje, por, nuk mund të ketë marrëveshje me përafrim të njëanshëm.”
Ndërsa Kryetari i LDK-së, Isa Mustafa, pas takimit deklaroi që partia e tij është e bindur që propozimin që ia ka ofruar Lëvizjes Vetëvendosje për ndarjen e barabartë të pushtetit i kontribuon marrëveshjes për bashkëqeverisje.
“U shprehëm se mbesim të hapur në qoftë se Lëvizja Vetëvendosje, si parti e parë i pranon kushtet tona për bashkëqeverisje, ne në çdo moment jemi të gatshëm që të lidhim marrëveshjen për qeverisje dhe konsiderojmë se do të jetë një marrëveshje që i kontribuon vendit, i kontribuon luftës kundër krimit dhe korrupsionit, i kontribuon zhvillimit ekonomik dhe jep përgjigje në besimin qytetar, të cilin ne e kemi marrë,” tha Mustafa.
Në takimin e Kurtit dhe Mustafës, morën pjesë shefja e zyrës së BE-së në Kosovë, Natalyia Apostolova, ambasadori i Gjermanisë, Christian Held, ambasadori i Mbretërisë së Bashkuar, Nicholas Abbott, si dhe përfaqësues të ambasadës së Shteteve të Bashkuara të Amerikës, Francës dhe të ambasadës së Italisë në Prishtinë. Ata nuk u deklaruan për media.
Në këtë takim, sipas përfaqësuesve të LVV-së dhe LDK-së, ambasadorët e Quint-it u informuan rreth rrjedhës së negociatave për krijimin e koalicionit qeverisës.
Lidhja Demokratike e Kosovës po e sheh dorëheqjen e kryetarit të sapozgjedhur të Parlamentit të Kosovës, Glauk Konjufca si zgjidhje për nyjën e krijuar rreth marrëveshjes për koalicion qeverisës me Lëvizjen Vetëvendosje. Sipas LDK-së, dorëheqja e Konjufcës do t’u hapte mundësi partive në negociata, Vetëvendosjes dhe LDK-së, që të ndajnë në mënyrë të barabartë pushtetin, ngase kjo pozitë do t’i bartej nën udhëheqje LDK-së, kurse pozita e kryeministrit Vetëvendosjes.
LDK pretendon që postin e kryetarit të parlamentit ta mbajë deri në ditën kur parlamenti ta zgjedhë presidentin e ri të Kosovës, diku në pjesën e parë të vitit 2021. Duke kërkuar që Vetëvendosje me marrëveshjen për koalicionin qeverisës ta mbështesë kandidatin e LDK-së për president, kjo e fundit më pastaj do t’ia kthente postin e kryetarit të kuvendit Vetëvendosjes, kurse do të ruante për vete postin e presidentit të shtetit.
Ndërkaq sa u përket ministrive, Vetëvendosje dhe LDK kanë një marrëveshje që ato të ndahen pesë me pesë, si dhe dy ministri për pakicat.
Por, një zgjidhje e tillë, e cila do të çonte në dorëheqje kryetarin e parlamentit Glauk Konjufca, po kundërshtohet nga partia fituese e zgjedhjeve, Lëvizja Vetëvendosje.
Për të ndihmuar në përafrimin e qëndrimeve dhe arritjen e marrëveshjes, Vetëvendosje ftoi në takimin e mbrëmjes së sotme edhe përfaqësuesit e vendeve të Quint-it dhe Bashkimit Evropian.
