S’ka raste të reja në Kosovë, Vitia: Ilaçet e përdorura kanë pasur efekt!

Ministri i Shëndetësisë i Kosovës, Arben Vitia, duke përditësuar sot të dhënat si dhe duke folur sot rreth masave që i kanë ndërmarr për parandalimin e koronavirusit, tha se nuk ka asnjë rast të ri me koronavirus dhe se disa ilaçe kanë pasur reagim pozitiv te pacientët.

“Ju informojmë se përmes Laboratorit të Mikrobiologjisë Molekulare në IKSHPK, deri sot janë testuar gjithsej 335 mostra të dyshimta në Covid-19 dhe gjithsej 20 prej tyre kanë rezultuar pozitive (+). Janë edhe rreth 1000 teste në stokun e Mikrobiologjisë molekulare në IKSHPK dhe pardje, me urgjencë janë porositur edhe 7000 të tjera, të cilat do të vijnë në fillim të javës që vjen. Kemi siguruar edhe një aparat tjetër për realizimin e RT-PCR testeve, i cili pritet të vihet në funksion nesër,” tha Ministri i Shëndetësisë i Kosovës duke shtuar se gjendja e 13 të prekurve që po trajtohen Klinikën Infektive është stabël ndërsa foli edhe për ilaçet që ishin të suksesshme:

“Pasi si sëmundje e re Covid-19 akoma nuk ka një protokoll të trajtimit me antiviral, dje dhe sot kemi marrë informacione se disa nga antiviralët si Remdesivir dhe Favipiravir janë treguar të suksesshëm në trajtimin e të infektuarve. Menjëherë sot janë kontaktuar kompanitë prodhuese, por edhe Ambasada siç është ajo e Japonisë dhe po shpresojmë që një kontingjent i këtyre barnave t’i marrim me kohë,” tha ministri Arben Vitia duke bërë të ditur se ka filluar shpërndarja e kontingjentit të parë të furnizimeve pas përfundimit të procedurave prej 400 000 eurove të ndara më herët nga Qeveria, me prioritet komunat ku janë ndaluar hyrje-daljet si Vitia, Klina, Malisheva dhe Malisheva.

Ndërkohë Instituti Kombëtar i Shëndetësisë Publike të Kosovës, IKSHPK, ka bërë të ditur sot janë testuar 16 mostra të dyshimta me SARS-CoV-2 dhe të gjitha janë negative.

Nga data 08.02.2020 deri më 19.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 335 mostra të dyshimta në virusin SARS-CoV-2 dhe prej tyre, gjithsej 20 kanë rezultuar pozitive.

Në qendrën e thirrjeve deri më tash janë pranuar në total 2.597 thirrje, ndërsa vetëm në 24 orët e fundit 553 thirrje telefonike.

Nga data 01.02.2020 deri më 19.03.2020 në Aeroportin ndërkombëtar “Adem Jashari” si dhe në pikat tokësore kufitare janë depistuar gjithsej 14.442 udhëtarë: në Aeroportin “Adem Jashari” 1.015 udhëtarë, Merdare 4.882, Vërmicë 3.832, Jarinje 929, Dheu i Bardhë 891, Hani i Elezit 1.430, Kullë 822, Qafë Morinë 47, Bërnjak 414, Qafë Prush 35, Muçibab ë 144 dhe Glloboçicë 1 udhëtarë.

Instituti Kombëtar i Shëndetësisë Publike të Kosovës (IKSHPK) po përcjell me vigjilencë të shtuar situatën epidemiologjike me COVID-19, po monitoron të gjitha rastet e kontakteve dhe atyre të cilëve u është rekomanduar për vetëizolim shtëpiak.

Ekipet e QRShP në rajonet përkatëse janë në terren dhe janë duke i kontakuar kontaktet e kontakteve të rasteve pozitive me COVID-19 për mbikëqyrje të rreptë për 14 ditë duke rekomanduar që personat të vetëizolohen dhe ata që kanë simptome të lajmërohen në klinikën infektive, thuhet në komunikatë.

Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke iu obliguar për vetëizolim dhe të kërkojnë ndihmë mjekësore nëse kanë simptome.

Në bazë të qarkores së Ministrisë së Shëndetësisë është rekomanduar reduktimi i operacionev e elektive dhe i vizitave në ambulancat specialistike spitalore.

Në nivel global, nga data 31 dhjetor 2019 deri sot sipas Worldometers, janë raportuar gjithsej 225.252 raste të COVID-19 me 9.276 raste të vdekjes, numri më i madh i rasteve raportohet nga Kina (80.928), Italia (35.713), Irani (18.407), përderisa në BE/AEE dhe Mbretëri të bashkuar janë raportuar gjithsej 93,419 raste: Itali (35.713), Spanjë (14.769), Francë (9.134), Gjermani (12.327), Mbretëri të Bashkuar (2.626), Holandë (2.051), Belgjikë (1.486), Greqi (418), Turqi (191), Serbi (97), Kroaci (99), Shqipëri (59), Maqedoni e Veriut (43) dhe Mal të Zi (8).

Deri sot, numrin më të madh të vdekjeve e shenon Kina me (3.245), Italia me (2.978), Irani (1.284), nga vendet e BE/AEE dhe Mbretëri të Bashkuar janë raportuar 4.188 raste të vdekjes: Itali (2.978), Spanjë (638), Francë (264), Mbretëri të Bashkuar (104), Gjermani (31), Belgjikë (14), Norvegji (6), Austri (5), Poloni (5), Greqi (5), Luksemburg (4), Danimarkë (4), Bullgari (3), Irlandë (2), Turqi (2), Shqipëri (2), dhe Hungari (1).

Ndërsa Ministri i Infrastrukturës dhe Ambientit. Lumir Abdixhiku, ka bërë të ditur se janë 834 qytetarë që duan të kthehen në Kosovë, derisa vetëm nesër nga Gjermania do të kthehen 130 qytetarë nga Gjermania.

Ministri Abdixhiku tha se si shtet e kanë për obligim të përkujdesen për secilin qytetar të vendit, por që bëri thirrje që vetëm udhëtarët me urgjencë të marrin rrugën e kthimit në Kosovë.

Ai ka deklaruar se secili qytetarë që kthehet në Kosovë do të vendoset në Qendrën e Studentëve në Prishtinë për 14 ditë.

“Deri në këtë moment janë evidentuar rreth 834 qytetarë që duan të kthehen në Kosovë dhe ne jemi duke i trajtuar këto raste në mënyrë të përbashkët. MSh ka shndërruar Qendrën e Studentëve në Prishtinë në qendë r karantinimi. Secili i kthyer në Kosovë në formë të organizuar do të vendoset në këtë qendër për 14 ditë. Sot, dje dhe nesër e më tutje të gjithë qytetarët do të transportohen me mjete dhe me ndihmë të Ushtrisë dhe ushtarëve tanë. Dje e kemi kthyer ekipin Kombëtar të Boksit, sot kemi kthyer 39 qytetarë nga Stambolli, nesër presim t’i kthejmë 130 qytetarë nga Gjermania. Po e përsëris, secili nga të kthyerit do të duhet të vendoset nën përcjellje strikte në karantinë për 14 ditë”, tha ai në një konferencë të përbashkët me ministrin e Shëndetësisë, duke shtuar se sot kanë zhvilluar një takim me kryeministrin, zëvendëskryeministrat dhe disa ministri, ku tha se kanë koordinuar ndihmat shtesë ekonomike dhe financiare që i duhen Kosovës në këto momente.

Abdixhiku potencoi se të gjitha mekanizmat shtetëror janë në funksion të furnizimit të rregullt të mallrave, lehtësirave financiare për bizneset dhe për funks ionimin e mirëfilltë të mirëmbajtjes publike dhe normalizimit të jetës në një gjendje jo normale.

Sa i përket funksionimit të tij si ministër pas fillimit të mocionit nga LDK për rrëzimin e Qeverisë, Abdixhiku tha se derisa është ministër do ta bëjë punën e tij.

“Ne jemi ministra, dhe për derisa jemi ministra të Qeverisë do të bëjmë punën tonë të përditshme për aq sa Kuvendi i Republikës na e jep këtë mandat. Ne nuk jemi deputetë, për fatin e institucioneve duhet t’i drejtoheni deputetëve. Për aq sa jemi ministra do ta bëjmë këtë detyrë, sepse e kemi obligim ligjor dhe kushtetutës”, tha ai ndërsa për ankesat e qytetarëve që kthehen në Kosovë e që janë ankuar për shtrenjtim të biletave, Abdixhiku tha se do të provojnë të adresojnë politikat e tyre që i kanë për të liruar këto bileta, por që potencoi se ka pak mundësi për të bërë një gjë të tillë.