S’ka tolerim/ KQZ apel partive: Urgjent emrat për anëtarët e KZAZ…

Komisioni Zgjedhorë i Zgjedhjeve, KQZ, i ka bërë thirrje partive politike që të dorëzojnë sot propozimet për anëtarë të KZAZ-ve.

Përmes zëdhënëses Drilona Hoxha, KQZ duke bërë të ditur se deri më tani kjo gjë nuk është bërë nga asnjë prej partive thekson se nuk do të tolerojë asnjë vonesë, pasi vonesat cenojnë përgatitjen profesionale të komisionerëve, rrezikojnë mbarëvajtjen e procesit dhe dëmtojnë cilësinë e zgjedhjeve .

“KQZ -ja është e vendosur të mos mirëkuptojë dhe as tolerojë vonesat në propozime, ndaj kërkon që partitë politike të depozitojnë urgjent propozimet e tyre për anëtarë të KZAZ-ve, brenda ditës së sotme dhe të mos bëhen shkak për cënimin e administrimit të procesit zgjedhor.”

Deklarata e plotë:

Data 18 Mars shënon afatin përfundimtar për depozitimin e propozimeve për KZAZ-të. Deri tani asnjë nga partitë politike që e gëzojnë këtë të drejtë, nuk ka sjellë pranë KQZ-së propozime për komisionerë të nivelit të dytë.

Komisioni Qendror i Zgjedhjeve i bën apel partive politike që kanë të drejtën të propozojnë anëtarë të KZAZ-ve që të respektojnë afatin ligjor për depozitimin e kandidaturave në KQZ.

KQZ këkon që partitë politike të mos neglizhojnë respektimin e afateve ligjore për paraqitjen e propozimeve për administratën zgjedhore, sikundër ka ndodhur në çdo proces zgjedhor. Mos respektimi i afatit ligjor tregon mungesë përgjegjshmërie në përmbushjen e detyrimeve që ju ngarkon Kodi Zgjedhor.

KQZ -ja është e vendosur të mos mirëkuptojë dhe as tolerojë vonesat në
propozime, ndaj kërkon që partitë politike të depozitojnë urgjent propozimet e tyre për anëtarë të KZAZ-ve, brenda ditës së sotme dhe të mos bëhen shkak për cënimin e administrimit të procesit zgjedhor.

Administrata zgjedhore duhet të trajnohet dhe kualifikohet për kryerjen e detyrave. Vonesat në propozime cenojnë përgatitjen profesionale të
komisionerëve, rrezikojnë mbarëvajtjen e procesit, dëmtojnë cilësinë e
zgjedhjeve.