Skadon afati, sot gjyqtarja Blerina Muçaj ose komunikon vendimin ose paditet nga PD

Lojërat e Edi Ramës me procedurat gjyqësore të Lulzim Bashës vazhdojnë në shërbim të shkërmoqjes së Partisë Demokratike. Rasti i fundit është me vendimin e gjyqtares Blerina Muçaj e cila ndonëse në mënyrë të paligjshme ka pranuar ankimin e deputetit Enkelejd Alibeaj ndaj vendimit të Gjykatës së Tiranës për regjistrimin e vendimeve të Kuvendit të 11 Dhjetorit, ende nuk i ka komunikuar zyrtarisht palës së vetme në proces, Komisionit të Rithemelimit; I cili madje i ka kërkuar më 26 Prill zyrtarisht Gjykatës së Tiranës që t’i komunikojë vendimin e gjyqtares, Blerina Muçaj.

Arsyeja e vetme, sipas PD është djegia e mundësisë që ky Vendim të ankimohet ndërsa i bënë të qartë Kryetarit të Gjykatës së Tiranën, Flamur Kapllani:

“Arsyeja e vetme e kësaj manovre vonese është që dosja e regjistrimit në gjykatë te Kuvendit të 11 Dhjetorit të degdiset në gjykatën e Apelit përpara se Partia Demokratike të ketë mundësine të ankimojë vendimin e gjyqtares Muça. Partia Demokratike i bën thirrje drejtuesve të Gjykatës Tiranë, përkatësisht kryetarit Flamur Kapllani dhe Kancelarit Donald Xhelili që të mos bëhen pjesë e këtij skenari bllokimi të paligjshëm,” thekson Partia Demokratike në deklaratën e saj duke paralajmëruar:

“Në qoftë se deri në përfundim të orarit zyrtar të ditës së hënë ende nuk do t’i jetë komunikuar zyrtarisht vendimi i gjyqtares Muça, atëherë ajo do të paraqesë kallzim penal për shpërdorim detyre për cilindo personazh të përfshirë në këtë skenar të jashtëligjshëm, pavarësisht pozicionit që mban.”

Ndryshe, që Edi Rama do të shkërmoq Partinë Demokratike kjo nuk është risi, por goditja më e fortë që pësoi partia më e madhe opozitare është kur pas LulzimBashës, pjesë e këtij projekti kriminal u bënë edhe dy Ish-Ministrat e Drejtësisë në kohën e qeverisjes së PD.

Deklaratë:

Jam këtu përpara jush për të denoncuar praktikat abuzive të gjykatës së Tiranës, e cila ne vijim të ndërhyrjeve të paligjshme në procesin e konfirmimit të organeve drejtuese legjitime të partisë, vazhdon të bëhet palë  në proces, duke favorizuar një fraksion i cili pasi mbajti peng vulen e demokrateve për muaj me radhe, tani kerkon përsëri t’i bllokojë ata nëpermjet marifetesh proceduriale.

Konkretisht, qe ne daten 26 Prill, Partia Demokratike i ka kerkuar zyrtarisht Gjykates se Tiranes qe t’i komunikojë vendimin e gjyqtare Blerina Muçaj e cila pranoi ankimin e deputetit Enkelejd Alibeaj kunder vendimit të Partisë Demokratike, me qëllim që të ushtronim të drejtën tonë ligjore të ankimit. 

Prej më shumë se 2 javësh, Gjykata e Tiranës nuk kthen përgjigje dhe nuk na vë në dispozicion vendimin duke u bëre pengesë për ta ankimuar këtë vendim në kundërshtim të plotë me ligjin. 

Arsyeja e vetme e kësaj manovre vonese është që dosja e regjistrimit në gjykatë te Kuvendit të 11 Dhjetorit të degdiset në gjykatën e Apelit përpara se Partia Demokratike të ketë mundësine të ankimojë vendimin e gjyqtares Muça. 

Partia Demokratike i bën thirrje drejtuesve të Gjykatës Tiranë, përkatësisht kryetarit Flamur Kapllani dhe Kancelarit Donald Xhelili që të mos bëhen pjesë e këtij skenari bllokimi të paligjshëm. 

Nga ana tjetër, Partia Demokratike paralajmëron se në qoftë se deri në përfundim të orarit zyrtar të ditës së hënë ende nuk do t’i jetë komunikuar zyrtarisht vendimi i gjyqtares Muça, atëherë ajo do të paraqesë kallzim penal për shpërdorim detyre për cilindo personazh të përfshirë në këtë skenar të jashtëligjshëm, pavarësisht pozicionit që mban.

Organet drejtuese legjitime të Partisë Demokratike i zgjedhin dhe përcaktojnë vetëm demokratët me votën e lirë dhe s’mund ti diktojë askush, as me vendime gjykate e as me marifete proceduriale.