Skandal diplomatik në Mal të Zi, Presidenti Bullgarisë largohet nga Qeveria pasi Kryeministri Spajiç u vonua 4 minuta

Takimi i Kryeministrit të Malit të Zi, Milojko Spajiç me Presidentin e Bullgarisë, Rumen Radev u anulua.

Sipas të përditshmes malazeze “Vijesti“, nga Qeveria është thënë se takimi i Kryeministrit Spajiç me Presidentin e Bullgarisë në godinën e Qeverisë është vonuar, kjo ishte dhe arsyeja që delegacioni i kryesuar me Radevin, pas katër minutave pritjeje, braktisi godinën.

“Me Ambasadorin e Bullgarisë ishim dakordësuar që takimi të mbahet në sallonin e pritjes në godinën e Qeverisë, pasi që Kryeministri Milojko Spajiç kishte dëshirë të madhe, përkundër agjendës së ngjeshur, të takohet me Presidentin Radev. Takimi pararendës i Kryeministrit me kompaninë më të madhe turistike gjermane, TUI, zgjati tre minuta më shumë se sa ishte planifikuar, e delegacioni i Presidentit të Bullgarisë, Rumen Radev, pas katër minutave pritjeje u largua nga godina e Qeverisë,” është shprehur për “Vijesti” Zyra e Kryeministrit.

Ky takim, ka sqaruar Zyra e Kryeministrit, duhej të zhvillohej në të njejtin sallon të pritjes ku u zhvillua takimi me përfaqësuesit e TUI, dhe arsye e vonesës ishte se salloni duhej të bëhej gati për takimin e radhës.

Ndryshe, Presidenti i Bullgarisë, Rumen Radev, vizitoi Malin e Zi me ftesë të Presidentit malazez, Jakov Milatoviç.