Skandal në armatën belge, ushtarë të lidhur me mafian shqiptare në trafikun e drogës dhe armëve

Një hetim është duke u zhvilluar për fakte që lidhen me drogën, municionin dhe pjesët e armëve në batalionin e 4-të inxhinierik të Amay, pranë Huy. Kjo përfshin trafik armësh me anëtarë të mafies shqiptare dhe çeçene, bënë të ditur sot Agjencia e lajmeve Belga.

Mediat kanë pushtuar me tituj bombastik këtë aferë të kontrabandës në armatën belge me mafian e huaj  (Scandale qui secoue l’armée belge: des militaires auraient vendu des munitions d’armes à des mafias étrangères) raporton gazeta zvicerane në gjuhën shqiper Le canton27.ch.

Ministri i Mbrojtjes, Ludivine Dedonder, PS, dhe “bossi” i ushtrisë, admirali Michel Hofman, njoftuan të enjten se një numër i caktuar ushtarësh nga ky batalion inxhinierik, një njësi frëngjisht-folëse në Amay që numëron rreth 600 burra dhe gra, janë pezulluar në mënyrë parandaluese nga funksionet e tyre për shkak të “fakteve serioze”, të natyrës “strukturore”. 

Një togë e këtij batalioni (një nën-njësi prej rreth tridhjetë vetësh) u shpërbë, një vendim “serioz” dhe “ndoshta unik” në historinë e fundit të Mbrojtjes. Por sipas gazetës Het Laatste Nieuws dhe kanalit televiziv privat flamand VTM, disa anëtarë të batalionit janë gjithashtu nën hetim për trafik armësh dhe krime të lidhura me drogën. Kjo do të përfshinte trafik armësh me anëtarë të mafies shqiptare dhe çeçene, shkruan gazeta zvicerane Le canton27.ch, duke ju referuar mediave belge.

Gjithashtu do të hetohet përdorimi i drogave të lehta dhe të forta brenda batalionit si dhe trafiku i drogës me bandat shqiptare dhe çeçene. Het Laatste Nieuws flet për një hetim të veçantë brenda zyrës së prokurorit federal./Le canton27.ch/