Skandal në Britani: Për shkak të neglizhencës, në dy spitale kanë vdekur 45 foshnje
Pas një hetimi zyrtar u konstatua se 45 foshnje që kanë vdekur në dy spitale britanike të East Kent Hospitals NHS Trust, ndoshta do të shpëtonin sikur kujdesi ndaj tyre do ishte në nivelin e duhur.
Mjeku Bill Kirkup i cili kryesoi hetimin tha se bëhet fjalë për zbulim të rëndë dhe shokues.
“Sikur të kishte kujdes për standarde kombëtare, rezultati do të ishte ndryshe tek 45 deri në 65 vdekje të hetuara të foshnjeve. Nuk kanë dëgjuar se çfarë u thonë gratë, i kanë shpërfillur dhe kjo ka shkaktuar disa raste të vdekjeve,” tha Kirkup, trasmeton Agjencia e lajmeve AFP.
Kirkup, i cili para shtatë viteve ka publikuar konstatime të ngjashme pas hetimit të vdekjeve të foshnjeve në një tjetër grup të spitaleve në Anglinë veriperëndimore, thekson se shumë prej tyre nuk kanë mësuar leksionet.
“Gjatë një periudhe dhjetëvjeçare Këshilli i East Kent në të paktën tetë raste mori ankesa për problemet. Mund ti korigjonin, rasti i parë ishte më 2010, por nuk e bënë. Vendosën të mohojnë problemin,” tha Kirkup.
Skandalet e përsëritura
Hetimi në East Kent filloi pas vdekjes së foshnjes me emrin Harry Richford, e cila vdiq në nëntorin e vitit 2017, shtatë ditë pasi lindi me operacion urgjent. Analiza tregoi se foshnja kishte vdekur për shkak të shtatë lëshimeve që paraqesin neglizhencë.
Të dhëna të ngjashme, Kirkup i ka zbuluar në vitin 2015, pas hetimit të shërbimeve të maternitetit në spitalet universitare Morecambe Bay NHS Trust.
Gjatë publikimit të raportit, Kirkup tha se është thellësisht shqetësuese se sërish po shfaqen problemet e njejta.
“Kur kam raportuar në vitin 2015 mbi shërbimet e maternitetit në Morecambe Bay, nuk kam menduar për asnjë çast se do të kthehem këtu për shtatë vjet dhe të hetoj një zhvillim të ngjashëm të rrethanave,” tha Kirkup duke shtuar:
“Kjo nuk mund të vazhdoj kështu. Këtë duhet ta zgjidhim në tjetër mënyrë. Nuk mund të sillemi sikur çdo herë kemi të bëjmë për raste të izoluara që nuk do të përsëriten më. Gjërat duhet ti bëjmë ndryshe.”
Ndryshe, para këtij raporti opinioni publik u trondit nga ai i muajit mars ku u vërtetua se mbi 200 foshnje mund të mbijetonin sikur ti ofrohej kujdesi më i mirë në spitalet Shrewsbury dhe Telford NHS Trust.
Fjala është për raste të vdekjeve të foshnjeve të porsalindura, ato që kanë vdekur pak kohë pas lindjes ose kishin dëmtime serioze të trurit gjatë periudhës 2000 deri 2019.
U konfirmua se nëntë nga 12 nëna që kanë vdekur gjatë kësaj periudhe mund të kishin trajtim shumë më të mirë, dhe se të tjerat mund të kishin lindur me rrugë natyrale por u detyruan të lindin me operacion.
