Skandali “AKSHI”, Berisha: Edi Rama ka përgjuar dhe kontrolluar edhe të huajt në Shqipëri

Skandali i AKSHI-t po kundërmon në Europë, tha sot Kryetari i Partisë Demokratike, Sali Berisha, duke akuzuar Edi Ramën se ka përgjuar dhe kontrolluar edhe të huajt në Shqipëri.

Fati i Ramës përcaktohet nga ai i Ballukut, tha sot Kryetari i Partisë Demokratike ndërsa ftoi qytetarët në 24 Janar në ora 17:00 të mbushim sheshet dhe rrugët e Tiranës për t’i dhënë leksionin e merituar Edi Ramës dhe narkoregjimit të tij.

“Fati i Edi Ramës në galloshet e Lubi Ballukut.

Fati i Edi Ramës përcaktohet tërësisht nga Lubi Balluku dhe ka krijuar një situatë të paimagjinueshme.
Një presion të gjithanshëm banditesk, publik, privat ndaj Gjykatës Kushtetuese.
Edi Rama kërkon me çdo kusht të mbrojë Lubinë, pasi ajo i betohet çdo ditë që në krah do të kem ty në qoftë se më lëshon.
Akti i fundit i saj, kërkon menjëhershëm të Spiropalit nga detyra e ministres së Jashtme, pasi sipas saj, ajo po ha dardha pas shpine.
Dhe kjo po ndodh dhe do ndodhë.
Ua dhashë këtë shembull jo për t’u marrë me intrigat mes tyre, por për të treguar plotfuqinë e Lubisë ndaj Ramës.
Ajo ka realizuar çdo gjë, siç faktojnë mesazhet, 6500 mesazhe në dosje, dy të tretat e të cilave lidhen direkt me Ramën, ka zbatuar vetëm urdhrat e saj,” tha sot Sali Berisha ndërsa bëri një akuzë të re në lidhje me skandalin “AKSHI”.

“Situata është edhe më dramatike dhe po kundërmon në mbarë Europën. Në kancelaritë evropiane nuk flitet për gjë tjetër veçse për AKSHI-n. Dy arsye.
Edi Rama ka përdorur AKSHI-n për të përgjuar dhe kontrolluar jo vetëm çdo qytetar shqiptar, por edhe çdo të huaj në Shqipëri.
Nga AKSHI janë eksportuar të gjithë të dhënat sekrete të Shqipërisë dhe ato të aleancës së Atlantikut të Veriut, tek organizatat kriminale dhe armiqtë e NATO-s dhe kjo përbën një dhunim të madh të sigurisë, jo vetëm për Shqipërinë, por edhe për rajonin dhe Europën.
Por AKSHI është një monedhë me dy faqe. Në njërën anë është Linda e AKSHI-t, në anën tjetër është Linda e Surrelit. Dhe kjo e trondit Edi Ramën. Kjo e shkatërron Edi Ramën,” tha lideri i opozitës ndërsa ftoj shqiptarët në protestën e 24 Janarit.

“Ndaj dhe jam sot këtu për t’u bërë thirrje qytetarëve shqiptarë, shpresa e fundit e Shqipërisë janë ata guximtarë që do vendosin të protestojnë gjer në largimin e Edi Ramës nga pushteti.
24 janari është një datë jashtëzakonisht e rëndësishme në përpjekjen për të rrëzuar këtë regjim, këtë organizatë kriminale që nuk njeh asnjë ligj, standard, Kushtetutë, normë apo standard.
Mbarë shqiptarët kudo që janë, njerëzit e lirë në Europë dhe në botë, presin me 24 janar fjalën e kryengritjes paqësore të qytetarëve të revoltuar të Tiranës dhe mbarë Shqipërisë,” tha Kryetari i Partisë Demokratike, Sali Berisha, duke përfunduar:

“Ndaj dhe në ora 5 të datës 24 janar ftoj çdo qytetar të Tiranës dhe mbarë vendit të mbushim sheshet dhe rrugët e Tiranës për t’i dhënë leksionin e merituar Edi Ramës dhe narkoregjimit të tij.”