“Skandali McGonigal”, Berisha në Parlament: Edi Rama të vijë këtu ose të shpallë dorëheqjen!

Kryetarja e Parlamentit të Shqipërisë, Lindita Nikolla, jo vetëm që nuk përfilli kërkesën e Partisë Demokratike për të ndryshuar Rendin e Ditës së seancës së sotme plenare dhe për një mocion me debat për arrestimin e ish-zyrtarit të FBI-së Charles McGonigal, dhe akuzat ndaj tij për marrjen e një shume prej 225 mijë dollarësh nga një ish-agjent i Sigurimit të Shtetit dhe takimet e padeklaruara me kryeministrin Edi Rama, por mohoi dhe të drejtën e fjalës demokrate nga foltorja parlamentare nga e cila Kryetari i PD, Sali Berisha, u detyrua ti drejtohet përmes rrjetit social Facebook ku sërish iu kërkua Edi Ramës të vijë në seancë ose të shpallë dorëheqjen.

“Këto ditë, Shqipëria gjendet në epiqendër të një cikloni që do poshtëronte çdo vend.

Kryeministri i Shqipërisë, ministrat e tij, këshilltarët e tij, janë të implikuar direkt në një aferë korruptive në korruptimin e njërit prej njerëzve me njohuri më të jashtëzakonshme, më sensitive, në SHBA për sigurinë e këtij vendi, por edhe sigurinë e vendeve të lira.

Prej muajsh, një juri ka urdhëruar hetimin e çdo mesazhi, çdo takimi, çdo udhëtimi, çdo dhurate, çdo emaili, dhe gjithçka tjetër midis McGonigal, Dorian Duçkës, Agron Nezës dhe Edi Ramës.

Kjo juri e citon në vendimin e saj të përsëritur Edi Ramën.

Por skandali shpërtheu në mënyrën më të fuqishme pas arrestimit në aeroportin Xhon Kenedi të McGonigal nga FBI, i cili akuzohet se ka manipuluar, falsifikuar dokumenta.

Akuzohet se ky njeri i pafytyrë, pa karakter, që ka shkelmuar interesat e vendit të tij, ka marrë porosi me para, nga zyra e kryeministrit shqiptar, për të hetuar lobimin e opozitës.

Ky kryeministër ka kryer një krim të shëmtuar, ka keqshfrytëzuar një njeri pa karakter, pa moral, në vend që ta denonconte në vendin e tij, e ka përdorur për qëllime të pushtetit të tij, e ka përdorur kundër opozitës, e ka përdorur për manipulime kundër saj.

Kjo ndodh vetëm në Korenë e Veriut, kjo ndodh vetëm me Maduron e Venezuelës.

Prandaj sot nuk mund të ketë në këtë parlament debat tjetër përveç këtij debati.

Edi Rama të vijë këtu ose të shpallë dorëheqjen dhe të dëshmojë në SHBA.

A e dini se kush ishte McGonigal, a e dini se cili ishte funksioni i tij, që i çoj paratë e kompanive të oligarkut rus? A e dini që Deripaska i ka tentakulat në të gjithë sektorët e ekonomisë shqiptare? A e dini se Damiani juaj është zëdhënësi kryesor i interesave ekonomike ruse në Shqipëri?” tha Kryetari i Partisë Demokratike duke e bërë të qartë se Edi Rama nuk ka shpëtim, ne do bëjmë detyrën tonë:

“E patë të dashur qytetarë se si ikën, si ia mbathën, si hije.

Të turpëruar, të papërgjegjshëm, të pashpresë para kësaj dallge të fuqishme, të cilën nuk do mund ta kalojnë pa dhënë llogari para jush gjer më një.

Afera Rama-Gonigal është nga aferat më kriminale, më të pista në tërë historinë e pasluftës së dytë botërore.

Një kryeministër korrupton një shef kryesor të zbulimeve për të luftuar opozitën në vend.

Një akt i pashembullt. Një akt, të cilin mund ta bënin diktatorë të tipit Gedafi apo Enver Hoxha.”

Me këtë rast Berisha akuzoi mazhorancës së bashku me liderin e tyre se janë kundër transparencës, sekt ky i cili është sot armik kryesor i demokracisë, i qenies, i identitetit të shqiptarëve.

“Sot i patë ju këta se si ia mbathën, se si u tmerruan nga transparenca që duhet të bëjnë për këtë skandal.

Ju e patë se si Edi Rama me dy konfidentë të tij, lozte me fatet e demokracisë së vendit.

Ju e patë se si janë të aftë të reagojnë para një superskandali, të reagojnë në kope, sikur nuk kanë zgjedhur, sikur nuk kanë familje, sikur nuk kanë interesa shoqërore dhe kombëtare, por vetëm interesa të xhepit të tyre.

Sekti i Rilindjes është sot armik kryesor i demokracisë, i qenies, i identitetit të shqiptarëve.

Ju siguroj se mandatin tuaj do e përdorim gjer në fund në interesin tuaj dhe sot nuk ka interes më të madh se transparenca e kësaj afere që ka cenuar sigurinë e SHBA, vendeve të lira, sigurinë e Shqipërisë, vetëm e vetëm se një aventurier, një agjent influent rus, merr përsipër të ekzekutojë çdo skenar për hir të pushtetit të tij, pavarësisht sa i kushton ky skenar një vendi mik, partner dhe vendit tonë.

Ndaj sot ne vendosëm të qëndrojmë në parlament!” ishte i prerë Kryetari i PD, Sali Berisha, duke përfunduar:

“Uroj ta kenë thirrur aty ku e ka vendin, por ju siguroj që kjo do të ndodhë se nga kjo aferë, Edi Rama nuk ka shpëtim.

Ne duhet të bëjmë detyrën tonë, t’i japim shtysën e fundit këtij njeriu që nuk lë gjë pa bërë në kurriz të interesave të vendit dhe shqiptarëve.”

Në situatën e krijuar, Kryetari i Grupit Parlamentar të PS, Taulant Balla përmes Lindita Nikollës miratuan ligjet të cilat kishin menduar ti miratojnë ndërsa deputetëve socialist u duhet të shikojnë nesër në faqen zyrtare të Parlamentit të Shqipërisë për të kuptuar se çfarë kanë votuar!