“Skandali McGonigal”, PD dorëzon kërkesën: Komision Hetimor, 44 deputetë firmosën

Partia Demokratike ka dorëzuar sot kërkesën e firmosur nga 44 deputetë ku kërkohet ngrita e Komisionit Hetimor për “çështjen “Skandalin Rama-McGonigal”. Pas dorëzimit të kërkesës, Nënkryetari i PD, Luçiano Boçi, dha detaje lidhur me objektin e kësaj kërkese ndërsa sqaroi dhe ato media në shërbim të Edi Ramës që më shumë ishin shqetësuar pse kjo kërkesë u firmos edhe nga ata deputetë që ata i konsideronin në shërbim të Kryeministrit.

“Me këtë komision do ta nxjerrim Ramën nga kamarja ku është fshehur, pasi që e dini shumë mirë që kryeministri nuk pranon as interpelancë, as mocion me debat, as vjen të japë shpjegime në parlament, por në mënyrë të çuditshme del nga frengjia e Skype-s dhe mundohet të justifikohet.

Paralelisht jeni njoftuar që Kongresi Amerikan ka ngritur një komision të tillë hetimor dhe ka kërkuar nga FBI të gjitha informacionet e detajuara për këtë çështje McGonigal, përfshirë edhe Ramën, sepse është edhe akuza e dytë që bëhet në aktakuzën e Grand Jurisë,” tha Luçiano Boçi duke shtuar se ky Komision do i marrë të gjitha detajet dhe do të kërkojë nga kryeministri të gjitha takimet dhe pjesët e duhura për të zbardhur të gjithë skandalin e përpjekjes së Ramës për të korruptuar institucionet e sigurisë amerikane me qëllim goditjen e sistemit politik në Shqipëri, goditjen e pluralizmit, eleminimin e opozitës.

Ndërkohë lidhur me paralajmërimin e kreut të Grupit Parlamentar të PS se nuk do të pranojë ngritjen e Komisionit Hetimor, Nënkryetari i PD sqaroi se rregullorja e përcakton qartë në nenin 25, kur ¼ e deputetëve kërkojnë ngritjen e një komisioni është detyrë e Parlamentit ta pranojë Komisionin.

“Unë them që do të detyrohet, do kërkojë me forcë zbatimin e rregullores se Kuvendit dhe nuk pres Hallellujah që ata të ndryshojnë mendim dhe unë të jem i kënaqur. Duhet zbatuar pikë për pikë rregullorja e Kuvendit. Është detyrim ligjor dhe kushtetues.

Këtu është shpresa dhe besimi im që duhet që të zbatohen ligjet e shtetit shqiptar. Ligjet e miratuara nga vetë Kuvendi, Rregullorja, Kushtetuta e vetë Kuvendit dhe Ligjet për Komisionet Hetimore.

Do t’i çojmë në Kushtetuese të dyja rastet. Edhe rastin e komisionit të parë për çarterat, edhe këtë rast për çështjen McGonigal-Rama.”

Në fund, Nënkryetari i PD, Luçiano Boçi, sqaroi dhe mediat e shqetësuara që kishin krijuar idenë se Edi Rama e ka Gazment Bardhin me hipotekë dhe me firmosjen e kësaj kërkese po vinte era “aromë bashkimi”:

“Sigurisht, këto janë sinjale dhe shprehin atë dëshirën politike për të qenë bashkë pjesë e refleksionit të instiktit politik për të qenë një në luftën përballë tij që konsiderohet dhe kundërshtari ynë i përbashkët.

Ne duam që raste të tilla të bashkëpunimit të jenë në vijëmësi, pasi në PD ka mendime të ndryshme, por nuk ka qëllime të ndryshme. Qëllimi ynë është i qartë e deri frontale me këtë mazhoranzë arrogante e cila si vërtetohet dhe faktohet kërkon të eleminojë pluralizmin në sistemin demokratik. Është detyra jonë dhe e çdo deputeti, çdo opozitari dhe qytetari që të mbrojë vlerat politike, vlerat e sistemit të mbrojë demokracinë.”

Ndryshe, objekti i Kërkesës për ngritja e Komisionit Hetimor të Parlamentit është verifikimi i
ligjshmërisë së:

(i) Kontakteve dhe marrëdhënieve të Kryeministrit Edi Rama me agjentin special të FBI Charles McGonigal, me shtetasin Dorian Duçka dhe ish-agjentin e Sigurimit të Shtetit Agron Neza, si dhe përfshirja e tyre në marrëdhënie dhe
ndërveprim me agjentin special të FBI Charles McGonigal dhe oligarkun rus
Oleg Deripaska;

(ii) Nxitjes, ndikimit, porositjes, përdorimit, përfshirë përmes premtimit dhe ofrimit të favoreve, rryshfetit apo pasurive publike, ndaj agjentit special të FBI
Charles McGonigal dhe/ose agjentë të tjerë të përfshirë, për përfitime politike
të Kryeministrit Edi Rama dhe goditjen apo dëmtimin politik të Opozitës
shqiptare;

(iii) Lejimit, lehtësimit dhe favorizimit të bërjes biznes në Shqipëri, përfshirë
dhënies së lejeve, licensave, dhe autozimeve shtetërore nga Qeveria apo entitete
shtetërore shqiptare, për investimet e oligarkut rus Oleg Deripaska, person i
afërt i Vladimir Putin dhe njëkohësisht nën sanksione nga SHBA, dhe që nga
data 08.04.2022 i sanksionuar nga Bashkimi Europian dhe Republika e
Shqipërisë;

(iv) Hapjes dhe zhvillimit të aktiviteteve të biznesit në Shqipëri të agjentit special
të FBI Charles McGonigal; si dhe

(v) Marrëdhënieve të biznesit në Shqipëri të kryera nga, ose ndërmjet shtetasve,
Oleg Deripaska, Charles McGonigal, Dorian Duçka, Mark Thomas Rossini,
Agron Neza, Shefqet Dizdari, përfshirë të gjithë ortakët, bashkëpunëtorët dhe
përfaqësuesit e këtyre të fundit, me kompani vendase apo të huaja në Shqipëri,
apo me institucionet shtetërore Shqiptare”.

Neni 77 i Kushtetutës së Shqipërisë, Neni 25 i Rregullores së Kuvendit, si dhe Ligji Nr. 8891, datë 02.05.2002 “Për organizimin dhe funksionimin e Komisioneve Hetimore të Kuvendit”, të ndryshuar.