Skandali tek Onkologjiku, zgjohet Edi Rama: Krim kundër njerëzimit! 

Në ditën e shtatë të zisë që ka kapluar krimi i bërë publik në Spitalin e Onkologjisë në QSUNT që mori dhenë, reagon më në fund i sapozgjuari Kryeministër Edi Rama duke e konsideruar atë që ndodhi në atë spital, si krim kundër njerëzimit.

“Duke u përgatitur për këtë adresim, që është edhe publik, dhe mes jush në spitalin Onkologjik, mu kujtuan fjalët e një prej heronjve të mjekësisë Besim Elezi që ‘as në ëndërr nuk e kishim parë dot një spital me këto kushte dhe ky spital nuk ka asgjë më pak se spitalet e Europës’.

Sot nuk mungon thuajse asgjë nga çfarë nuk kishim dje, por fatkeqësisht jo gjithnjë figura dhe përkushtimi i mjekëve janë në lartësinë e misionit që nis me betimin e hipokratit,” tha Edi Rama në një takim me drejtuesit e shërbimeve në Qendrën Spitalore Universitare “Nënë Tereza”, duke konstatuar se përdorimi i uniformës më delikate të shtetit si maskë e bandave për të nxjerrë para me gjakun e ilaçet e të sëmurëve, është krim kundër të gjithë njerëzimit.

“Ky spital nuk ka asgjë më pak se spitalet e Europës. Të mos jesh në lartësinë e detyrës është hall i madh, por të kesh marrë diplomën e licencën e të përdorësh uniformën më delikate të shtetit si maskat e bandave për të nxjerrë para me gjakun e ilaçet e të sëmurëve, është krim kundër të gjithë njerëzimit,” tha Kryeministri Edi Rama duke përfunduar:

“Koha e heronjve i ka lënë vendin një kohe tjetër!”