SKAP-i i dha sinjalin e qartë Edi Ramës, PD: Pushteti mund të bëjë çdo krim elektoral dhe nuk do hetohet

By Pa frike Last updated Jan 31, 2024 1 017

Prokuroria e Posaçme kundër Korrupsionit dhe Krimit të Organizuar, SPAK, që ditën e parë që u krijua, akti dhe gjestin e parë që bëri, ishte amnistimi i krimit elektoral të pushtetit, tha sot Sekretari i Përgjithshëm të PD, Flamur Noka, ndërsa bëri të ditur se një grup deputetësh të Partisë Demokratike kanë firmosur një kallëzim të dytë penal për shtetasin Karlo Bolino, një skemë tipike mafioze e financuar me para publike për të blerë mediat e më pas për t’i përdorur si snajper kundër opozitës.

“E mbani mend ju, dosja 339 dhe dosja 184 ishin dy dosje që bënë bujë në gjithë botën për përfshirjen e ministrave, zyrtarëve policorë dhe të kryeministrit, të kryetarëve të bashkive të rilindjes, në një krim të rëndë elektoral.

Po ju rikujtoj se në krijimin e tij, SKAP-i kishte tre shtylla të punës së tij. Krimi elektoral, krimi i organizuar, korrupsioni i zyrtarëve shtetërore. Me shtyllën e parë që ka të bëjë me krimin elektoral, e pushkatoi vetë SKAP-i, i dha amnisti, dosjet i zhduku dhe e amnistoi.

Që në këtë moment u pa qartë se kjo organizatë që ishte krijuar për të dhënë drejtësi, vendosi një standard padrejtësie.
Me mbylljen e këtyre dy dosjeve, SKAP-i i dha sinjalin e qartë Edi Ramës dhe çdo shqiptari se pushteti mund të bëjë krim elektoral çfarë të dojë dhe nuk do hetohet,” tha Flamur Noka duke shtuar se sot nuk ka shqiptar në këtë vend që nuk e di se rilindësit, patronazhistët, policia, shërbimi, prokuroria, bandat, të gjitha janë të përfshira në blerje votash, dhunë dhe shantazh e terror të shqiptarët.

“Edhe OSBE/ODIHR ka paraqitur një raport që qartëson përfshirjen e çdo instance shtetërore dhe joshtetërore në manipulimin e votave. SKAP-i ka pasur një synim gjatë këtyre zgjedhjeve, edhe Policia e Shtetit. Kanë denoncuar, duke fabrikuar letra për militantë të PD, që po punonin kundër pushtetit,” tha Sekretari i Përgjithshëm të PD, Flamur Noka, duke e konsideruar si një formë kërcënimi dhe shantazhi për anëtarët dhe militantët e PD dhe të opozitës ndërsa përfundoi:

“Po ka njeri që thotë sot në Shqipëri që opozita paska blerë vota, përveçse SKAP-i me këtë veprim?

Po a ishte PD që hyri në zgjedhje me simbole të vjedhura, me fonde të rrëmbyera nga shteti, me zero lekë?

Këto SKAP-i nuk i sheh. SKAP-i me këtë veprim ka treguar qartësisht se misioni i tij është të luftojë opozitën, t’i shpallë luftë opozitës.”

Deklaratë:

Të nderuar qytetarë!

Jam sot në këtë konferencë për shtyp për t’ju bërë me dije se një grup deputetësh të Partisë Demokratike kanë firmosur një kallëzim të dytë penal për shtetasin Karlo Bolino.

Një skemë tipike mafioze e financuar me para publike për të blerë mediat e më pas për t’i përdorur si snajper kundër opozitës.

Është fakt i mirënjohur tashmë se Bolino ka marrë objektet “Bunkart 1” dhe “Bunkart 2”, të cilat i shfrytëzon për qëllime përfitimi ekonomik.

Në faqen zyrtare të Bunkart jepen detaje për këtë projekt dhe përkatësisht:

Ideator dhe kurator i përgjithshëm i projektit BUNK’ART është gazetari italian Karlo Bolino, ndërsa stafi i kërkimeve historike udhëhiqet nga gazetarja Admirina Peçi. Projekti BUNK’ART është mbështetur nga OJF shqiptare “QENDRA URA”.

Gazetari Romeo Kodra ka kërkuar informacion pranë Ministrisë së Kulturës, për procedurën e ndjekur, e cila i është përgjigjur se:

“Ministria e Kulturës ka një kontratë për këtë projekt me Qendrën për Studime Sociale dhe Ligjore. Kjo ministri nuk ka zhvilluar asnjë procedurë tenderimi pasi këto fonde nuk i nënshtroheshin Ligjit për Prokurimin Publik. Fondet janë alokuar me një VKM të veçantë”.

Kjo përgjigje ngre shumë dyshime pasi procedura për të cilën shprehet Sekretarja e Përgjithshme e Ministrisë së Kulturës Elira Kokona përcakton:

“Fondi në dispozicion të thirrjes për projekt-propozime është 12.000.000 lekë. Shuma për të cilën një organizatë mund të aplikojë shkon nga 100.000 deri në 1.500.000 lekë”.

Pra, sipas udhëzimit një organizatë/OJF, mund të përfitonte maksimalisht 1.500.000 lekë e ndërkohë, Qendra për Studime Sociale dhe Ligjore ka përfituar ne muajin dhjetor 2014, 2 pagesa në vlerën 11.985.000 lekë.

Në datën 03.12.2014, portali Open Data Albania, i njohur për transparencën e fondeve buxhetore, ka publikuar një shkrim ku hedh dritë mbi këtë aferë.

Në shkrim pasqyrohet një kronikë shteruese e ABC NEWS, në të cilën Kryeministria kishte sqaruar se Bunkeri mbetej në administrim të Ministrisë së Mbrojtjes. Ministria e Mbrojtjes dhe Ministria e Kulturës kishin financuar këtë OJF në vlerën 17.000.000 lekë.

Sipas këtij investigimi, Qendra për Studime Sociale dhe Ligjore nuk figuronte e regjistruar në gjykatë.
Zyra e shtypit të KM sqaronte se nuk kishte informacion për një kompani të quajtur Spazio Eventi Albania.

Të gjitha këto sa citova më lartë janë informacione publike por drejtësia e re nuk i shihte.

Por të shohim më në detaje procedurën e ndjekur.

Në datën 10.09.2014, Këshilli i Ministrave, miraton VKM nr.596 “Për një shtesë fondi në buxhetin e viti 2014, për festimet e 70-vjetorit të çlirimit të vendit”.

Kjo VKM i hapi rrugën fondeve dhe fillimit të procedurës për miratimin e fituesit “Qendra për Studimet Sociale dhe Ligjore”, nga Ministria e Kulturës.

Kjo praktikë është gjetur me shkelje të rënda nga KLSH-ja kur ka audituar fondet në Ministrinë e Kulturës. për të cilën ka kërkuar masën disiplinore “Largim nga Shërbimi Civil” për Sekretaren e Përgjithshme Elira Kokona. Por Elira Kokona ishte ushtare besnike e partisë. Ajo do përdorej për të shantazhuar gjyqtarët në mars të këtij viti, për t’i rrëmbyer simbolet dhe vulën Partisë Demokratike. Ajo nuk duhej të hidhej poshtë edhe pse KLSH e kërkon, por duhej ngritur lart në detyrë.

KLSH-ja konstaton se:

“Me urdhrin nr.309, datë 30.10.2014 të Ministrit të Kulturës, urdhërohet financimi i projektit “BUNKERI” që do të realizohet nga QSSL në vlerën 11.985.000 lekë, autorizohet znj. Elira Kokona për nënshkrimin e kontratës me z. Ergys Gezka, Drejtor Ekzekutiv i QSSL me të cilin është lidhur kontrata e shërbimit nr.5208 datë 11.11.2014”.

Lidhja e kësaj kontratë është bërë në kundërshtim me ligjin nr 10352, pasi subjekti përfitues nuk është përzgjedhur nga komisioni i ngritur për vlerësimin e cilësisë artistike e ekonomike dhe kolegjiumi.

Ministër Kulture në atë kohë ishte Mirela Kumbaro.

Pas përfitimit të fondeve të para shihet se pagesat për BUNK’ART i kalojnë një tjetër OJF, “QENDRA URA” dhe kjo ka për drejtues Ergys Gezka.

“QENDRA URA” ka përfituar 320.000 euro pagesa nga Buxheti i Shtetit, përveç të ardhurave të përfituara nga biletat e shitura.

Një moment shumë i rëndësishëm që e lidh Karlo Bolinon me këto fonde është kompania Spazio Eventi Albania.

Kompania e themeluar nga ‘presta-nome’ i Karlos, Lindita Doda (kjo themeloi kompaninë MTSC që përfitoi pronën për REPORT TV) dhe disa shtetas të tjerë.

Në vitin 2018, Alba Malltezi blen 59% të aksioneve të kësaj kompanie.

Nga analizimi i bilanceve të ‘Spazio Eventi Albania’ konstatohet se është përfituesi fundor i shumës 11.985.000 lekë të dhënë nga Ministria e Kulturës.

Pjesë shumë e rëndësishme e kallëzimit është emri Ergys Gezka dhe familjarë të tij që kanë ngritur një skemë me disa OJF, të cilat përfitojnë fonde nga Buxheti.

I përdoruri i Karlo Bolinos për BUNK’ART, Ergys Gezka ka mbajtur disa funksione publike gjatë periudhës 2015-2021 në Bashkinë e Tiranës, Ministrinë e Shëndetësisë dhe Ministrinë e Financave.

SPAK duhet të bëjë ndjekjen e parave dhe do të kuptojë fare qartë se Karlo Bolino ka ngritur një skemë të sofistikuar organizatash fiktive për të përfituar para publike.

Një pikë tjetër shumë e kallëzimit penal është financimi i kompanisë së Karlo Bolinos, C-7 Communication Systems nga kompania në zotërim të Igli Gjelishtit, Image&Communications Development.

Kompania e Igli Gjelishtit ka përfituar 12 milionë dollarë tendera në periudhën 2019-2023, para të cilat kanë financuar fiktivisht Karlo Bolinon për të ndërtuar Report TV dhe jo vetëm.

Kompania e Karlo Bolinos ka përfituar pjesë të madhe të parave të tenderave publikë të dhëna nga Mirlinda Karçanaj, për të cilën opozita po përgatit një tjetër dosje.

I bëjmë thirrje SKAP të veprojë sa më parë për të gjitha kallëzimet penale të depozituara nga Partia Demokratike, për aferat e kësaj qeverie.

Janë kallëzime të plota nga ekspertët e Partisë Demokratike, por ende ka vetëm heshtje nga SKAP-i, i cili ka prioritet persekutimin e opozitës dhe jo dënimin e të korruptuarve të kësaj qeverie.

PYETJE PERGJIGJET ME GAZETARET:

Erneta Shevroja, ABCNews: Z. Noka, deputeti Agron Gjekmarkaj deklaroi për mundësinë e krijimit të një partie të re nga grupi i Gazment Bardhit, nëse nuk arrihet bashkimi. Çfarë komenti keni?

Flamur Noka: E kuptoj shqetësimin, por ju them se është një shqetësim që nuk qëndron. Grupi parlamentar i PD është i bashkuar dhe ky bashkim është që në shtator. Grupi parlamentar i PD është i gjithë në aksion dhe ky aksion as është ndaluar dhe as do ndalet. Ka vetëm një moment që ne jemi duke e konkluduar dhe ky moment është bashkimi tërësor në struktura dhe në ekipin e PD. Pra ajo që kemi thënë vazhdimisht, fuzioni total në parti. Nuk ka asnjë pengesë, nuk ka asgjë që mund të ndalë këtë bashkim tërësor. Ka vetëm një panik nga Edi Rama dhe regjimi i tij për këtë bashkim. Dhe sigurisht në këtë panik, Edi Rama mundohet të fusë pirueta duke keqinterpretuar apo duke tentuar të keqinterpretojë deklaratat e kolegëve.

-Ku qëndron keqkuptimi në këtë rast?

Flamur Noka: Pra, zoti Gjekmarkaj nuk ka thënë për asnjë moment që bashkimi nuk do ndodhë, bashkimi do ndodhë. Unë jam në kontakt të përditshëm me kryetarin e grupit, zotin Bardhi, me zotin Gjekmarkaj, të cilin e kam edhe mik. Nuk ekziston askund as edhe një hije e vogël për bashkimin.

Osman Stafa, News24: Në fakt është deklaruar nga ju, se muaji janar do të ishte muaji i bashkimit jo vetëm të grupit të PD, por edhe partisë. Teksa jemi në fund të muajit, diçka të tillë se kemi parë, a ka ndonjë afat të ri për bashkimi dhe deri në çfarë muaji do ti prisni, meqë muaj kalojnë dhe zgjedhjet afrohen.

Flamur Noka: Është e vërtetë që ne e kemi thënë se muaji janar do jetë muaji i bashkimit dhe ne jemi thuajse në përfundim të këtij procesi. Presim që kryetari i grupit parlamentar dhe disa të tjerë të kthehen nga një vizitë në SHBA dhe do konkretizojmë gjithçka.

Isa Myzyraj, OraNews: Në çdo palë zgjedhje keni akuzuar PS-në për korrupsion, për masakra zgjedhore. Në këto momente që po flasim, SPAK ka dënuar një mbështetës tuaj në bashkinë e Kavajës, për korrupsion në zgjedhje.

Flamu Noka: Është ky SKAP-i që ditën e parë që u krijua, akti dhe gjestin e parë që bëri, ishte amnistimi i krimit elektoral të pushtetit. E mbani mend ju, dosja 339 dhe dosja 184 ishin dy dosje që bënë bujë në gjithë botën për përfshirjen e ministrave, zyrtarëve policorë dhe të kryeministrit, të kryetarëve të bashkive të rilindjes, në një krim të rëndë elektoral.

Që në këtë moment u pa qartë se kjo organizatë që ishte krijuar për të dhënë drejtësi, vendosi një standard padrejtësie.

Me mbylljen e këtyre dy dosjeve, SKAP-i i dha sinjalin e qartë Edi Ramës dhe çdo shqiptari se pushteti mund të bëjë krim elektoral çfarë të dojë dhe nuk do hetohet. Ka shqiptar sot në këtë vend që nuk e di se rilindësit, patronazhistët, policia, shërbimi, prokuroria, bandat, të gjitha janë të përfshira në blerje votash, dhunë dhe shantazh e terror të shqiptarët.

Edhe OSBE/ODIHR ka paraqitur një raport që qartëson përfshirjen e çdo instance shtetërore dhe joshtetërore në manipulimin e votave. SKAP-i ka pasur një synim gjatë këtyre zgjedhjeve, edhe Policia e Shtetit. Kanë denoncuar, duke fabrikuar letra për militantë të PD, që po punonin kundër pushtetit. Kjo është një formë kërcënimi dhe shantazhi për anëtarët dhe militantët e PD dhe të opozitës.

Po ka njeri që thotë sot në Shqipëri që opozita paska blerë vota, përveçse SKAP-i me këtë veprim?

Po a ishte PD që hyri në zgjedhje me simbole të vjedhura, me fonde të rrëmbyera nga shteti, me zero lekë?

Këto SKAP-i nuk i sheh. SKAP-i me këtë veprim ka treguar qartësisht se misioni i tij është të luftojë opozitën, t’i shpallë luftë opozitës. Kjo që sapo thatë ju është një nga provat, që i jep opinionit publik dhe na jep ne dhe çdo shqiptari.

Anesti Bajramemaj, A2CNN: Teksa ju flisni për bashkim, ditën e djeshme keni marrë një vendim për 4 koordinatorë, dhe edhe për Belind Këlliçin, që e keni emëruar drejtues politik për qarkun e Tiranës. A jeni konsultuar me grupin tjetër të Gazment Bardhit për këtë vendim, sepse ka pasur zëra se ky është vendim i njëashëm.,

Flamur Noka: Ne jemi parti, institucion. PD ka institucionet e saj, ka Kryesinë, ka Këshillin Kombëtar, ka grupin parlamentar. PD ka një statut mbi bazën e të cilit funksionon dhe mbi bazën e të cilit funksionon dhe mbi bazën e të cilit koordinohet kompetenca e çdo njërit nga institucionet. Pa as më të voglin diskutim, për çdo gjë që bëhet në grupin parlamentar vendos kreu i grupit, kryesia e grupit dhe grupi parlamentar. Për çështjet e aspektit funksional organizativ, vendosin Kryesia dhe Këshilli Kombëtar. Nuk ka asgjë këtu për t’u shqetësuar. Gjithçka ka të bëjë me fuqizimin e zyrës së organizimit të partisë. Të vetmit që mund të shqetësohen janë segmente të rilindjes, grupi parlamentar i PD nuk është i shqetësuar.