Skema e tarifimit në rrugën e kombit si pagesë e kamuflueme

Me datën 22 qershor u prezantue nga qeveria skema e tarifimit në rrugën e kombit.

Po ta analizojmë këtë skemë do shofim se kjo nuk asht asgja tjetër veçse një kamuflim i pagesës për me krijue idenë se po bajmë një zgjidhje, që në fakt nuk asht zgjidhje, e aq ma pak zgjidhje e drejtë.

-Kur në prezantiminn e vet ministri Gjiknuri na deklaron se: “grupi ndërministror paska  negociuar me kompaninë koncesionare… dhe kanë arritur të përmbyllin paketën lehtësuese tarifore për komunitetin lokal”, harron se po ti nënshtrohemi një logjike normale për rastin në fjalë, para se me diskutue me koncesionarin, duhej me diskutue me komunitetin lokal që e ka kundërshtue këtë taksë, me e pytë pse e kanë kundërshtue dhe nëse kundërshtuesit kanë ndonjë opsion ose propozim. Këtë gja nuk e kan ba as ministrat e as grupi ndërministror. (për me qenë korrekt, kanë bisedue me disa njerëz që nuk kanë kundërshtue asgja po thjeshtë kanë duartrikitë gjithçka)

Më poshtë ministri na prezanton “zemërgjansinë” e qeverisë duke na njoftue se paskan “pranuar kërkesën e bizneseve (kryesisht atyre të kosovës), për të spostuar rinisjen e zbatimit të kalimit me tarifë përtej sezonit aktual turistik…”

Këtu nënteksti vihet si rregull për me kamuflue të vërtetën dhe thuhet “kryesisht të Kosovës” kur asnjë biznes tjetër ose grupim biznesesh nuk i ka kërkue këtë shtymje. Sidoqoftë, nëse bizneset e Kosovës i paskan kërkue kët gja ministrit Gjiknuri, kjo nuk përban asgja thelbësore pasi e shtymja nuk asht zgjidhje, edhe për faktin se pas këtij sezoni aktual turistik do kemi edhe 29 sezone të tjeta që do kërkohet pagesë. Për kët po dyshojmë se nuk asht e vërtetë as si kërkesë e vetme e bizneseve të Kosovës, as si plotësim i kësaj kërkese për bizneset e Kosovës e as ndonjë zemërgjansi e qeverisë.

Po “zemërgjansia” e qeverisë duket se nuk mbaron me kaq, por vazhdon me njoftimin e ministrit kur na thotë se:  “qeveria po merr rriskun më të madh… për të zgjidhur një problem social meqenëse Kukësi është zonë e varfër … dhe jemi koshient për këtë”.

Në kët rast po detyrohemi ne me e njoftue ministrin se nuk asht koshient për kët gja sepse:

-së pari ju nuk po merrni rrisk me këtë skemë por po merrni rrisk sepse po insistoni në zbatimin e kësaj skeme;

-së dyti, ju kujtojmë se Kukësi nuk asht zonë e varfer, përkundrazi ashtë zonë shum e pasun, por ka qytetare të varfër, të lanun në kët gjendje prej keqadministrimit që i ashtë ba prej qeverive në vijueshmëri;

-së treti, kuksianët nuk po lypin lëmoshë por drejtësi dhe ju nuk po ia ofroni këtë, e për këtë arsye ju po merrni rrisk dhe po vazhdoni me e shtue masën e rriskut kur na njoftoni se: “nga 17 shtatori do të fillojë të aplikohet tarifa” , duke e ba fakt të kryem këtë tarifë (taksë), pa dakortësinë e komunitetit që e kundërshtoi.

Gjithashtu përpiqeni me e kamuflue diskriminimin e kësaj pagese duke deklarue se: “nuk kemi ndjekur parim diskriminues”

E si mund të mendoni që nuk ka diskriminim zotni ministër kur vetëm qytetarët dhe bizneset e qarkut të Kukësit dhe të Kosovës duhet me pagujt sepse shkojnë te shpia e tyne, e kjo vetëm se e kanë shpinë në Kukës apo Prizren. Si nuk qenka diskriminim kur dikush don me vizitue Kuksin ose Kosovën, e për kët duhet me pagujtë, e për ndryshe, nëse viziton Sarandën ose Apolloninë, nuk ke nevojë me pagujtë. Si nuk qënka diskriminim kur një prizrenli udhëton prej Prishtine, Shkupi apo Sofjes, nuk pagun për me shkue të shpia e vet, e nëse vjen prej Tirane, duhet me pagujtë. (ju kujtoj se Maqedonia i ka të gjitha rrugët dytsore pa pagesë ndërsa Bullgaria e ka pagesën e vinjettes ditore zero euro)

E sado që të përpiqemi me qenë dashamir me këtë skemë të qeverisë, asht vetë ministri që nuk na len me e ba kët gja, kur na kujton se po na kerkon pagesë dyfishe për një rrugë të pa përfundueme dhe jashtë standarteve duke na thanë se: “po vazhdon investimi për ta përfunduar segmentin nga Kukësi në Morinë duke e sjellë brenda parametrave të duhura”, e natyrisht kjo duhej me mjaftue për me i vu kapak kësaj historie.
Por jo, nuk ashtë kështu dhe zotnia guxon me vazhdue me: “Ajo është rrugë sa është e vështirë edhe strategjike. Pse është e vështirë? Këndet gjeologjike gjeografike I ka të vështira, një pjesë e saj ngrin gjatë dimrit, ndërkohë që strategjikisht është mundësia e Aeroportit të Kukësit,”

Duke u mundue me e kuptue këtë fjali konfuze, (për kët shkak u detyruem me e vu të plotë) po mendojmë se e ka pasë fjalën për rrugën që na qenka e vështirë… sepse një pjesë ngrin gjatë dimrit…

Atëhere edhe ne po pyesim se si ja bajnë p.sh. në Kosovë që të gjitha rrugët ngrijnë gjatë dimrit?
Për informacion po ju tregojmë se në Kosovë, si taksë (ose tarifë) për mirmbajtjen e rrugëve, marrin vetëm 40 € në vit për veturat dhe 90€ në vit për kamionat (Ligji Nr. 04/L-117 shtojca B) e për hir të së vërtetës i kan ndërtue dhe i mirmbanjë shumë ma mirë se rrugët tona.

Ndërsa strategjikisht na qënka mundësia e aeroportit !!!  Jo mor jo, strategjia e kësaj rruge asht lidhja midis shqiptarëve, gja të ciles ju nuk po i  ndihmoni por po e pengoni dhe po e ndani edhe ma shume me kët “kufi”. Ndoshta nga fundi asht edhe aeroporti që ju e paskeni për zemër e për këtë arsye nuk e vutë në punë për kaq vite.

Po të kalojmë te pjesa e sqarimeve teknike se si do operohet, do shofim se çdo lloj matematicieni do haste vështirësi me e deshifrue.
E kur mendon se të gjitha këto komplikime bahen vetëm se qeveria për arsye të panjohuna nuk don me ba një zgjidhje të drejtë duke marrë si model të taksimit të rrugëve një vend europian, cilindo, e me e zbatue të njëjtin sistem, atëhere natyrisht që kjo skemë nuk asht e pranueshme.