Slloveni, sot Samiti i Procesit Brdo-Brijuni

Në Brdo të Sllovenisë sot mbahet Samiti i Procesit Brdo-Brijuni, ku do të diskutohet për situatën në Ballkanin Perëndimor.

Përveç organizatorit të takimit, presidentit slloven, Borut Pahor, raporton RFE, marrin pjesë edhe presidentja e Kosovës, Vjosa Osmani, i Shqipërisë, Bajram Begaj, i Serbisë, Aleksandar Vuçiç, i Malit të Zi, Millo Gjukanoviç, i Maqedonisë së Veriut, Stevo Pendarovski, i Kroacisë, Zoran Millanoviç, si dhe anëtarët e presidencës trepalëshe të Bosnjës, Shefik Xhaferoviç, Millorad Dodik dhe Zhelko Komshiç.

Kabineti i Pahorit ka njoftuar më herët se Samiti i Procesit Brdo-Brijuni, do të jetë një mundësi për të rishikuar situatën aktuale në Ballkanin Perëndimor dhe për t’iu bërë thirrje anëtarëve dhe institucioneve të Bashkimit Evropian që të përshpejtojnë procesin e zgjerimit.

Procesi Brdo-Brijuni, raporton RFE, është një nismë slloveno-kroate, e ndërmarrë në vitin 2010 nga Borut Pahor, në atë kohë kryeministër i Sllovenisë.

Qëllimi i saj është forcimi i besimit të ndërsjellë në Ballkanin Perëndimor, bashkëpunimi rajonal dhe integrimi më i shpejtë i këtij rajoni në BE.