S’mori mandatin, Kandidati më i votuar i PD në Shkodër: E keqja fitoi një betejë, por lufta vazhdon!
I shtati në listën e Partisë Demokratike për Qarkun Shkodër ku PD arriti të fitoj vetëm pesë mandate, Bardh Spahia rezultoi kandidati më i votuar i kësaj partie me 7.219 vota edhe pse ngeli jashtë Parlamentit.
Sot duke shprehur mirënjohjen për mbështetjen e pakursyer, për të gjithë ata që i dhanë në garën e 25 Prillit, njeriu që me plotë të drejtë mund të akuzoj gjithë lidershipin e Partisë Demokratike që e la pa mandat dhe PD-në pa Bardh Spahinë, nuk e bëri këtë, Por, kishte një mesazh për gjithë bashkpartiakët dhe ata që e mbështetën:
“E keqja fitoi një betejë, por lufta vazhdon! Unë do të jem gjithmonë aty për Shkodrën tonë, për Shqipërinë!”
Kjo sjellje fisnike ndaj PD dhe lidershipit të saj nuk vjen thjeshtë nga demokrati Bardh Spahia ashtu si dhe mirënjohja për mbështetje nga njerëz të njohur e panjohur, komshinjtë në lagjen ku u rrit, të rinjtë e të rejat e deri tek miqtë e shumtë!
Sot është shumë e lehtë të jeshë një anëtar i Partisë Demokratike ku Kryetar është Lulzim Basha, por është përgjegjësi shumë e madh kur je anëtar i PD dhe vjen nga familja e njohur shkodrane Spahia, dhe aq më shumë kur je i biri i demokratit model, Ali Spahia!
Statusi i plotë:
MIRENJOHJE DHE RESPEKT!
Në pamundësi për t’ju falënderuar fizikisht secilin nga ju, dua t’ju shpreh mirënjohjen time me zemër për mbështetjen e pakursyer, që më dhatë në garën e 25 Prillit. Ajo mbështetje, që e kam ndjerë në vazhdimësi ndër vite kudo, që nga njerëz të njohur e panjohur në rrugët e qytetit tim, tek komshinjtë në lagjen time ku u rrita, tek të rinjtë e të rejat e deri tek miqtë e shumtë në rrjete sociale, është përgjegjësi dhe motivimi im për të qenë zëri juaj i pakompromis, në emër të Partisë Demokratike, në Kuvendin e Shqipërisë.
Mirënjohje për ekipin energjik e të motivuar, që punoi me mua ditë pas dite e pa orar, për të përcjellë projektin tonë të ndryshimit për Shqipërinë. Kam marrë mbështetje, por edhe kam mësuar shumë prej të rinjve të talentuar të qarkut tonë, njohje të hershme apo të reja, të kthyera tashmë në miqësi që do vijojë të forcohet.
Zhvilluam një betejë, të cilën e kishim fort për zemër, e të cilës i dhamë gjithë energjinë, përvojën, përkushtimin, por sidomos pasionin për të bërë më të mirën për Shkodrën tonë.
Falenderime nga zemra edhe për miqtë, kolegët mjekë, personalitete të fushave të ndryshme, e të njohurit e shumtë brenda e jashtë vendit, që edhe duke mos qenë banorë të Shkodrës, më inkurajonin me vëmendjen e tyre sistematike gjatë kësaj fushate.
Falenderime për familjen time, që më ka mbështetur pa kushte dhe me pasionin, përkushtimin dhe besimin e palëkundur në vlerat dhe aspiratat e Partisë Demokratike, të trashëguar nga një traditë e gjatë, e qëndrueshme dhe e pandryshueshme.
Falënderoj gjithashtu komisionerët, vëzhguesit, numëruesit dhe përfaqësuesit e PD, për impenjimin e tyre të jashtëzakonshëm gjatë këtyre ditëve e netëve të lodhshme. U jam pafundësisht mirënjohës!
E keqja fitoi një betejë, por lufta vazhdon! Unë do të jem gjithmonë aty për Shkodrën tonë, për Shqipërinë!
Ju falem të gjithëve,
Bardh Spahia
