S’ngopet me deklarata Anti-Yuri Kim, Rama: Kreun e SPAK s’e zgjedh Qeveria, Ambasada SHBA jo se jo!
Ndërsa kanë mbetur edhe pak orë deri te zgjedhja e kreut të ri të SPAK, Kryeministri Edi Rama nuk po ngopet dot me deklarata publike kundër Ambasadores së Shteteve të Bashkuara, në Tiranë, vetëm pse ajo kërkoi që procesi i zgjedhjes së kreut të Prokurorisë së Posaçme mos të jetë i ndikuar nga ata që kanë interes për të kufizuar apo manipuluar hetimet sepse, sipas saj, drejtësia duhet të jetë e verbër ndaj pushtetit.
Sot Edi Rama vazhdon me deklaratat Anti-Yuri Kim përmes rrjetit social Twitter duke theksuar se kreun e ri të SPAK s’e zgjedh Qeveria por as Ambasada amerikane.
“Jam plotësisht dakord me ambasadën e SHBA dhe boll me thashethemet e katundit politik e mediatik! Kreun e SPAK s’e zgjedh as qeveria, as foltorjavulorjafallgjorja, as ambasada jo e jo, po një institucion i quajtur Këshilli i Lartë i Prokurorisë, që varet vetëm nga anëtarët e vet!” shprehet Edi Rama përmes rrjetit social Twitter duke përfunduar:
“Prandaj anëtarët e KLP të mos dëgjojnë askënd përveç kandidatëve, të mos lexojnë asgjë përveç biografisë profesionale të kandidatëve, të mos influencohen nga askush përveçse nga profili e performanca e kandidatëve! Ata japin llogari vetëm para pasqyrës së tyre dhe askujt tjetër.”
Ky reagim i ashpër i Edi Ramës vjen pas deklaratës së Ambasadores Yuri Kim përmes rrjetit social Twitter pasi kishte takuar çdo anëtar të Këshillit të Lartë të Prokurorisë:
“Gjatë javës së fundit jemi takuar me çdo anëtar të Këshillit të Lartë të Prokurorisë (KLP) për të nënvizuar rëndësinë e zgjedhjes së një kreu të ri të SPAK, i cili do të intensifikojë luftën kundër korrupsionit dhe krimit të organizuar, pa frikë apo favore.
Procesi i përzgjedhjes nuk duhet të ndikohet nga ata që kanë interes të kufizojnë ose manipulojnë hetimet. Ky është thelbi i reformës në drejtësi: drejtësia duhet të jetë e verbër ndaj pushtetit, prokurorët e gjyqtarët duhet t’i trajtojnë të gjithë si të barabartë para ligjit, institucionet duhet të jenë të pavarura,” shprehet Yuri Kim mëngjesin e sotëm përmes rrjetit social Twitter duke përfunduar:
“Reforma në drejtësi nuk është vetëm një kusht për anëtarësimin në BE; është kërkesë e drejtë e popullit shqiptar. SHBA do të qëndrojë gjithmonë me popullin e Shqipërisë. Ne do të vazhdojmë të mbështesim me vendosmëri zbatimin e reformës në drejtësi. Kjo nuk do të ndryshojë. Do të monitorojmë nga afër procesin e përzgjedhjes për SPAK për t’u siguruar që reforma në drejtësi të ecë përpara.”
Ndryshe, ky kundërshtim i Kryeministrit pasoi përplasjen e mbrëmshme pasi Ambasadorja amerikan Yuri Kim deklaroi se do rrijë edhe ca kohë Tiranë, ndërsa Edi Rama konfirmoi informacionin e Ministrisë së Jashtme të Shqipërisë, “se procesi për zëvendësimin e Ambasadores Yuri Kim, siç është thënë nga Ministria e Jashtme, e ka nisur Departamenti i Shtetit jo ne”.
